Ունենք նոր իրավիճակ ու որոշումն էլ կկայացվի այդ նոր իրավիճակի վերաբերյալ: Այս պահին որոշումը կայացված չէ, հակառակ դեպքում ես կհայտնեի: Սակայն չի բացառվում, որ որևէ սահմանափակող միջոցառում տեղի ունենա այդ թվում նաև հանրային հավաքների հետ կապված:
Մենք բազմիցս նշել ենք, որ հանրային առողջությունն ամենակարևորն է մեզ համար: Այս մասին լրագրողների հետ զրույցում հայտարարեց Առողջապահության նախարար Արսեն Թորոսյանը՝ կոչ անելով հետևել միայն պաշտոնական հաղորդագրություններին:
Թորոսյանը նշեց, որ երեկվա դրությամբ Ծաղկաձորում կար 46 մեկուսացված անձ և 6 ընտանիք Երևանում. «Այս պահին էլ մեկուսացման գործընթացներ են տեղի ունենում, չի բացառվում, որ թիվն աճի»:
Նախարարը չբացառեց, որ առաջիկայում Ծաղկաձոր տեղափոխված 31 քաղաքացիները տուն կուղարկվեն, սակայն դա կարվի ստուգումներից հետո:
Թորոսյանը կոչ արեց համաճարակի օջախ հանդիսացող վայրերից Հայաստան ժամանածներին սահմանափակել շփումները և ինքնամեկուսանալ. «Եվ ամենակարևորը՝ գանգատների ի հայտ գալու դեպքում պետք չէ զբաղվել ինքնաբուժմամբ: Պետք է անմիջապես հայտնել մեր ծառայություններին, որպեսզի մենք կարողանանք թեստ դնել»:
Նախարարը նաև նշեց, որ վարակված անձն այս պահին վարակակիր չէ. «Եթե ես հենց հիմա ձեզանից որևէ մեկից վարակվեմ կորոնավիրուսով, ես մեկ րոպե, 5 րոպե, 2 օր հետո վարակակիր չեմ լինի: Վիրուսի մեծ քանակ է պետք, որպեսզի այն արտազատվի ու մյուսներին վարակի: Հետևաբար այսօրվա սխեման միակ գործողն է հիվանդության տարածումը կանխելու համար»:
Հարցին, թե ինչ է ենթադրում ինքնամեկուսացումը, նախարարը պարզաբանեց՝ մնալ տանը, եթե հնարավոր է՝ առանձին սենյակում ու սահմանափակել շփումները:
Թորոսյանը նաև նշեց, որ երեկ հայտնաբերված պացիենտները տարբեր օրեր են վերադարձել Իտալիայից: