Վաշինգտոնը բավարար չափով վկայություններ ունի այն մասին, որ կորոնավիրուսը դուրս է եկել Չինաստանի Ուհան քաղաքում գտնվող լաբորատորիայից: Այս մասին ABC News-ի հետ զրույցում հայտարարել է ԱՄՆ պետքարտուղար Մայք Պոմպեոն:
«Մենք հենց սկզբում հայտարարեցինք, որ վարակը դուրս է եկել Ուհանից: Հիմա դա կարող է տեսնել ամբողջ աշխարհը»,-ասել է նա:
Պոմպեոյի խոսքերով, շատ գիտնականներ խոսում են այն մասին, որ վարակն արհեստածին է, սակայն ինքը ծանոթ է նաև այն պնդումներին, որ այն բնական ծագում ունի:
ԱՄՆ պետքարտուղարը չի պատասխանել հարցին՝ արդյո՞ք վարակի տարածումը եղել է միտումնավոր, թե դա տեղի է ունեցել լաբորատորիայում տեղի ունեցած միջադեպի արդյունքում:
«Մենք անում ենք մեզանից կախված ամեն ինչ բոլոր հարցերի պատասխանները ստանալու համար: Մենք, ԱՀԿ-ն փորձում ենք խումբ ուղարկել այնտեղ և Չինաստանի այլ լաբորատորիաներ, սակայն չինական իշխանությունները շարունակում են արգելափակել մուտքը»,-ասել է նա:
