Հայաստանում գրանցվել է կորոնավիրուսի կրկնության դեպք: Այս մասին Ազգային ժողվոում հայտարարեց Առողջապահության նախարար Արսեն Թորոսյանը:
Խոսքն այն մասին է, որ կորոնավիրուսով վարակված պացիենտը բուժվել է, սակայն երկրորդ անգամ ևս վարակվել է:
«Բայց հիմա ակադեմիական մեծ դեբատ է ընթանում: Մենք ամեն օր թարմ գիտական ինֆորմացիա ենք ստանում՝ արդյո՞ք դա կրկնակի վարակ է, թե պարզապես եղել է վիրուսի ապաակտիվացում, հետո ակտիվացում: Իսկ ամենահավանականը վիրուսի ոչ ակտիվ մասնիկների առկայությունն է հյուսվածքներոմ, երբ վիրուսը չի բազմանում, սակայն նրա ՌՆԹ-ն առկա է բջիջներում և մենք թեստավորման ժամանակ հայտնաբերում ենք:
Ամեն դեպքում մեր ունեցած դեպքերը երեքն են կամ չորսը: Նրանք որևէ գանգատ, սիմպտոմ չունեն, սակայն նրանց մոտ դուրս գրումից հետո նորից վիրուս է հայտնաբերվել: Մենք նրանց կրկին մեկուսացրել ենք, որպեսզի հավանական վարակումը կանխարգելենք»,-ասաց նա։
«Նման դեպքեր արձանագրվել են նաև Չինաստանում, Հարավային Կորեայում: հենց Հարավային Կորեայում էին եկել եզրահանգմանը, որ դա ոչ թե կրկնակի վարակում է, այլ վիրուսի մասնիկների պահպանում է բերանի խոռոչի հյուսվածքներում, որը ՊՇՌ-ով հայտնաբերվում է»,-նշեց նախարարը:
Թորոսյանի խոսքերով, հաշվի առնելով այն, որ հարցը դեռևս պարզված չէ, նույնիսկ վարակվելուց ու առողջանալուց հետո պետք է պահպանել կանոնները. «Չգիտես, թե ինչ հայտնագործություն վաղը տեղի կունենա: Ես սա ասում եմ ընդհանուր տրամաբանության մեջ»:
