Այսօր երեկոյան «Մոսկվա» կինոթատրոնում «Ոսկե Ծիրան»-ի «Հետահայաց ցուցադրություններ» ծրագրի բացումը կլինի «Անա Արաբիա» ֆիլմի ցուցադրությամբ: «Անա Արաբիա» ֆիլմի ռեժիսորն ազգությամբ հրեա Ամոս Գիտայն է: Առավոտյան՝ լրագրողների հետ զրույցի ժամանակ, Ամոս Գիտայը խոսեց հայ և հրեա ազգերի անցյալի մասին՝ ասելով, որ այնքան լավ տեղյակ չէ միջին արևելքում առկա իրավիճակի մասին, որքան մենք, բայց կա որոշակի զուգահեռ հայ և հրեա ժողովրդի միջև, քանի որ նրանք տեսել են ջարդեր, կա խնդիր ինքնության և սեփական տարածքի:
«Հայերի և հրեաների միջև նմանություն տեսնելով՝ լիովին արդարացված և օրինական եմ համարում հայերի պահանջը ցեղասպանության ընդունման գործում: Սա պարզապես անցյալի հիշողության հետ կապված մի սենտիմենտալ խնդիր չէ, այլ խնդիր՝ որի հետ կապված է մեր ապագան, քանի որ միայն անցյալի ոճրագործությունների ընդունմամբ կարող ենք վստահ լինել, որ չի լինի բռնություն թե՛ հայ, թե՛ հրեա, թե՛ ցանկացած ժողովրդի նկատմամբ»,- ասաց Ամոս Գիտայը:
Ռեժիսորն իր խոսքում նշեց, որ նկարում է ֆիլմ ինքնության մասին և անձնական մոտեցում ու վերաբերմունք է ցուցաբերում, քանի որ ֆիլմը լրագրողական աշխատանք չէ, որ միայն փաստեր նշվեն՝ առանց սուբյեկտիվության: Ռեժիսորը նշեց, որ կինոարտադրությունը հզոր մի ձև է՝ պահպանելու հիշողությունը և անցյալը:
www.analitik.am-ի այն հարցին, թե ի՞նչ գիտի Հայաստանի մասին՝ նա պատասխանեց.
«Որոշ չափով տեղեկացված եմ հայ ժողովրդի պատմությունից: Երուսաղեմի ամենագեղեցիկ թաղամասերից մեկը հայկական թաղամասն է, որտեղ ես եղել եմ և ունեմ շատ հայ ընկերներ: Ատոմ Էգոյանը ևս իմ լավ ընկերն է և ինձ միշտ պատմել է Հայաստանի մասին: Երկար տարիներ մտածել եմ Երևան գալու մասին՝ ներքուստ միշտ համակրանք ունենալով այն խնդրի շուրջ, որ այստեղի ժողովուրդն էլ է անցել տառապանքի միջով և կարիք ունի այդ մասին աշխարհին ներկայացնելու»:
Գիտայը նաև նշեց, որ ժամանակին Ռոտերդամում հանդիպել է Փարաջանովին և տպավորված է այդ հանդիպումից:
Ամոս Գիտայը ծնվել է 1950-ին Հայֆայում (Իսրայել):
2013-ին Վենետիկի ՄԿՓ-ում Գիտայը «Անա Արաբիա» (2013) ֆիլմի համար արժանացավ SIGNIS-ի մրցանակին՝ պատվավոր հիշատակման և «Կանաչ Կաթիլ» մրցանակին: Նրա գործերի հետահայաց մեծ ցուցադրություններ են կազմակերպվել Պոմպիդու կենտրոնում (Փարիզ), NFT-ում և ICA-ում (Լոնդոն), Լինքոլն կենտրոնում (Նյու Յորք), Բեռլինի Kunstwerk-ում, Մադրիդի, Երուսաղեմի, Փարիզի, Սան Պաուլուի, Տոկիոյի, Թորոնթոյի ֆիլմադարաններում և այլուր:
Արմինե Բրսոյան
Նկարները՝ Քրիստինա Դանիելյանի
