Ցուրտ ամիսներին սննդային թունավորումների թվի աճը պայմանավորված է տնային պայմաններում պահածոյացված սննդամթերքի օգտագործմամբ, ավելի տաք եղանակին թունավորման պատճառ կարող են դառնալ ոչ ճիշտ ջերմային պայմանները: Թունավորման առումով առավել ռիսկային են ապխտած միսը, երշիկը, ձկնեղենը, կաթնամթերքը, ձուն և այլն:
Սննդային թունավորման երկու տեսակ կա` մանրէային եւ քիմիական:
Սննդային մանրէային թունավորումների դեպքում սննդում եղած ախտածին մանրէներն արտադրում են թունավոր նյութեր: Իսկ սննդային քիմիական թունավորումների պատճառը սննդի մեջ որոշ մետաղների մեծ քանակն է: Հաճախ սա նորմալ կամ բարձր թթվայնություն ունեցող սնունդը մետաղյա տարաների մեջ պահելու պատճառով է լինում։
Մասնագետները խորհուրդ են տալիս մետաղյա տարայով պահածոն բացելուց հետո տեղափոխել ապակյա տարայի մեջ:
Նրանք վստահեցնում են` եթե միսը կամ մյուս այն սննդամթերքը, որ նախատեսված չէ տվյալ ջերմաստիճանային պայմաններին, սառնարանում չէ, վերջ, պետք չէ գնել, մեկ- երկու ժամում այն փոխում է իր միկրոֆլորան եւ դառնում վտանգավոր` թունավորման տեսակետից:
Սննդային թունավորումները հիմնականում դասվում են սուր հիվանդությունների թվին, որոնց բնորոշ է կարճատև գաղտնի շրջանը, հանկարծակի սկզբը և բուռն ընթացքը:
Եթե նկատում եք թունավորման նշաններ, ապա առաջին հերթին պետք է կատարել հետեւյալ գործողությունները.
- Տուժածի մոտ արհեստական փսխում առաջացրեք։
- Ձեռնարկեք ջրազրկումը կանխարգելող քայլեր:
- Ահազանգեք շտապ օգնություն։
- Վերահսկեք տուժածի վիճակը, գրանցեք տվյալները և ցուցաբերեք համապատասխան օգնություն։
Զանի Հարոյան