Երևանի պետական համալսարանի արևելագիտության ֆակուլտետի փոխդեկան, թուրքագետ Ռուբեն Մելքոնյանը, հրավիրված մամուլի ասուլիսի ընթացքում անդրադառնալով Թուրքիայի հայկական եկեղեցիներում ապրիլի 24-ին զանգերը չղողանջելու վերաբերյալ Պոլսո հայոց պատրիարքության հայտարարությանը, ասաց, որ հաճախ պատրիարքության և հայ համայնքի կողմից քայլեր են արվում, որ Թուրքիայի իշխանությունները չեն էլ պահանջել:
«Պատրիարքությունը իրեն դուրս է դնում հայոց եկեղեցու քայլերից: Թուրքիայի տարածքում գործող 42 հայկական եկեղեցիներում զանգերը չեն ղողանջելու: Ծրագրվում է հոգեհանգիստ երկու ժողովուրդների զոհերի համար, և սա տեղավորվում է թուրքական այն քարոզչության մեջ, որ կոչվում է ընդհանուր ցավ»,-ասաց Ռուբեն Մելքոնյանը՝ նշելով, որ Պոլսո պատրիարքությանը Թուրքիայի իշխանությունները որոշակի դեր են վերապահել, և այն չի խոսում հայ համայնքի շահերից:
«Սա հայ եկեղեցուն թուրքական քաղաքականության մեջ ներքաշելու հերթական և դատապարտելի փորձն է: Մեր ունեցած տվյալներով՝ ապրիլի 24-ին Չանաքքալեում տեղի է ունենալու հոգեհանգիստ այդ պատերազմում զոհված հայ և թուրք հերոսների համար: Սա անթույլատրելի բան է»,-նկատեց թուրքագետը:
Բանախոսի գնահատմամբ պոլսահայոց պատրիարքությունը պատասխանատու է Թուրքիայի տարածքում գտնվող եկեղեցիների ու հայերի համար և չի կարելի իրեն այդպես դուրս դնել հայկական գործընթացներից:
«Բայց և՛ Հայաստանի, և՛ Թուրքիայի համար կարևոր է տեսնել, որ Ցեղասպանությունից 100 տարի հետո հայոց պատմական հայրենիքի տարբեր հատվածներում՝ Մուշում, Դիարբեքիրում, Դերսիմում տեղի են ունենալու հիշատակի միջոցառումներ: Սա խոսում է վերազարթոնքի որոշակի երևույթների մասին, դրանք միանշանակ պետք է ողջունել, բայց ավելի զուսպ, որպեսզի տեղ չտանք թուրքական քարոզչության թաքնված ծուղակներին»,–ասաց նա։
Ռուբեն Մելքոնյանը տեղեկացրեց նաև, որ ապրիլի 24-ին հայ համայնքի այլախոհ հատվածը թուրքական պատվերներից դուրս տարբեր միջոցառումներ կանի, քանի որ համախմբված է Մայր Աթոռի շուրջ. «Ստամբուլի և Արևմտյան Հայաստանում ապրող հայության խնդիրները չեն լուծվում, դրանք ավելի են խորանում, քանի որ Էջմիածնի հետ կապը կտրված է»:
Պատմական էքսկուրս անցկացնելով՝ թուրքագետն ասաց, որ նույնիսկ Խորհրդային միության ժամանակ այդ կապը շատ ավելի շատ է եղել:
