Այսօր և վաղը, «Թանգարանների գիշեր» համաեվրոպական միջոցառման տասնամյակի առիթով, հայաստանյան թանգարանների մուտքն այցելուների համար կլինի անվճար։ Մշակութասեր հասարակության համար սրանք տարվա ամենահաճելի օրերից են: Այս առիթով Analitik.am-ը, որոշեց անդրադառնալ թանգարանային գործունեության վիճակագրական պատկերին: Ուսումնասիրելով վերջին 10 տարիների վիճակագրությունը, որը տրամադրել է ՀՀ ազգային վիճակագրական ծառայությունը, պարզ դարձավ, որ Հայաստանում գործող թանգարանների թիվը, 2003-ի համեմատ, ավելացել է 19-ով: 2013 թվականի տվյալներով՝ ՀՀ-ում գործում է 104 թանգարան, որից 65-ը Երևանում:
Նույն տարիների վիճակագրությունը նաև ցույց է տալիս, որ Հայաստանի թանգարանների գեղանկարչական աշխատանքները տարիների ընթացքում զգալի պակասել են, ինչի արդյունքում ունենք հետևյալ պատկերը՝
2003 թվական՝ 178 հազ. 997 գեղանկարչական աշխատանք
2004 թվական՝ 178 հազ. 300
2005 թվական՝ 178 հազ. 700
2006 թվական՝ 191 հազ. 400
2007 թվական՝ 110 հազ. 600
2008 թվական՝ 108 հազ. 379
2009 թվական՝ 44 հազ. 20
2010 թվական ՝ 37 հազ. 156
2011 թվական՝ 41 հազ. 244
2012 թվական՝ 41 հազ. 977
2013 թվական՝ 42 հազ. 746
Այսպիսով, մաթեմատիկական պարզ հաշվարկով՝ վերջին 10 տարում Հայաստանի թանգարաններից պակասել է 136 հազ. 251 գեղանկարչական աշխատանք կամ դրանց թիվը պակասել է ավելի քան 4 անգամ: Բնականաբար, հարց է առաջանում՝ ինչո՞ւ են պակասել թանգարանների գեղանկարչական աշխատանքները, եթե տարիների ընթացքում թանգարանների թիվն աճել է: Այս հարցով Analitik.am-ը ՀՀ մշակույթի նախարարությունից և ՀՀ ԱՎԾ-ից տեղեկություն ստանալու հարցումներ է պատրաստել, որոնց պատասխաները կհրապարակի ստանալուն պես: Իսկ մինչ այդ զերծ ենք մնում որևէ մեկնաբանությունից:
Ի դեպ, պաշտոնական վիճակագրությունը ցույց է տալիս, որ վերջին 10 տարում նվազել են նաև Հայաստանի թանգարաններում գտնվող կիրառական արվեստի առարկաների թիվը՝ 30 հազ. 907-ով (2013 ցուցանիշը համեմատած 2003-ի հետ):
Սեդա Հերգնյան
