Լրագրողների հետ զրույցում ԱԺ ԲՀ խմբակցության պատգամավոր Վարդան Ղուկասյանը հրաժարվեց խոսել Արամ Վարդանյանի («Վստրեչի Ապեր») տանը երեկ կատարված իրադարձությունների մասին՝ նշելով, որ չի ցանկանում այդ թեմայով խոսել:
Ինչ վերաբերում է առհասարակ «պատերին ծեփելուն», «ասֆալտին փռելուն», պատգամավորը հայտարարեց, որ դրան միանշանակ դեմ է, չի սիրում այդ խոսքերը, մանավանդ, որ վարչապետն է ասում. «Ինչ վերաբերում է հանցագործություններ կատարողներին, երկիրը թալանողներին, պետք է պատասխան տան: Մենք դրան կողմնակից ենք ու սպասում ենք: Մենք կողմնակից ենք, որ դատարանով ապացուցեն ու դատեն: Ես Արամ Վարդանյանի դեպքի մասով որևէ բան չեմ կարող ասել, դրա համար այդ հարցին չեմ ուզում անդրադառնալ»:
Ամեն դեպքում Ղուկասյանը նշեց, որ միանշանակ դեմ է երեխաներին վախեցնելուն, առանց մեղադրանք առաջադրելու, օրենքը շրջանցելով մարդկանց վախեցնելուն. «Եթե հանցանք է գործել, թող դատեն: Բայց եթե բան չեն ապացուցում, ուղղակի ընկել են մարդկանց ետևից, ուրեմն ես դեմ եմ»:
Ինչ վերաբերում է այս օրերի կարևոր թեմաներից մեկին՝ կորոնավիրուսին, պատգամավորը նշեց, որ այդ թեմայի մասին շատ է խոսվել, ուստի ինքը չի ցանկանում կրկին անդրադառնալ դրան, միայն կարող է հումորով պատասխանել հարցին՝ «Ինձանից հեռու կանգնեք». «Գյումրիում մեկը բժշկին ասում է, որ գրիպ է, բժիշկն ասում է՝ ինձանից հեռու կանգնի»:
Ինչ վերաբերում է Գագիկ Ծառուկյանի հայտարարությանը, թե կորոնավիրուսը բարի մարդկանց չի կպնում, Ղուկասյանը նշեց, որ պետք է վերջինիս հումորը հասկանալ: