Ռուսաստանը և Չինաստանն արդեն քննարկում են միջբանկային գործարքների համակարգի ստեղծման հեռանկարները, որը կդառնա միջազգային բանկային փոխանցումային SWIFT համակարգին այլընտրանք:Այս մասին հայտարարել է փոխվարչապետ Իգոր Շուվալովը՝ Պեկինում կայացած բանակցություններից հետո:
«Այո, այս գաղափարը քննարկվել է և դրական արձագանք ստացել», -ասել է նա, պատասխանելով SWIFT համակարգին այլընտրանք ստեղծելու հեռանկարների վերաբերյալ հարցին:
Zerohedge.com-ը գրում է, որ հետաքրքիրն այն է, որ Ռուսաստանին երկու շաբաթով SWIFT համակարգից օգտվելու սահմանափակում դրել է Մեծ Բրիտանիան: Այսինքն՝ Ռուսաստանը հերթական անգամ ցույց է տալիս, որ անհրաժեշտության դեպքում իսկ պայմաններով կարող է հրաժարվել ԱՄՆ դոլարից:
Ռուսաստանը SWIFT ֆինանսական շուկայից կախվածությունն ուզում էր թուլացնել դեռևս այն ժամանակ, երբ կիրառվեցին առաջին պատժամիջոցները, երբ միջազգային վճարային Visa և MasterCard համակարգերը հրաժարվեցին աշխատել որոշ ռուսական բանկերի հետ:
Շուվալովի խոսքերով, Չինաստանի հետ քննարկվում են նաև անկախ ռեյտինգային գործակալություն ստեղծելու հեռանկարները: Առաջարկություններն այդ մասով պատրաստ կլինեն 2014-ի վերջին:
Չինական UnionPay վճարային համակարգը, որը պետք է դառնա Ռուսական ազգային վճարային համակարգի գործընկերներից մեկը, պատրաստ է լիառժեք համագործակցության և պատրաստ է ապահովել անհրաժեշտ ենթակառուցվածքները:
«Եթե վճարային համակարգի մասով հայտնի է, թե ինչ պետք է արվի և ինչպես, ապա SWIFT –ի դեպքում մի փոքր այլ է, դա գաղափար է, որն այսօր մեզ դուր է գալիս, մենք այն առաջ ենք մղել, բոլորը դրական արձագանք տվեցին, այժմ պետք է աշխատել այդ ուղղությամբ», — հայտարարել է Շուվալովը:
Zerohedge.com-ը գրում է, որ այս ամենը խոսում է այն մասին, որ Եվրազիական տնտեսական միությունը աստիճանաբար հրաժարվելու է դոլարից: Իսկ ԱՄՆ նախագահ Օբաման էլ կարող է պատմության մեջ մտնել՝ որպես երկրի նախագահ, ում օրոք դոլարը սկսել է կորցնել իր ազդեցությունը: Օբամային հիմա էլ են մեղադրում ԱՄՆ արտաքին քաղաքական ուղղության քայքայման մեջ և անվանում են պատմության մեջ եղած ԱՄՆ վատագույն նախագահ, իսկ դոլարի գերիշխանության ավարտը կթուլացնի համաշխարհային պահուստային ֆոնդի դիրքերը, և ամերիկյան իմպերիայում կսկսվի անկառավարելի ճգնաժամ:
Երբ Ռուսաստանը և Չինաստանը ցույց տան, որ փաստացի հնարավոր է հրաժարվել դոլարից, առավել ևս այն դեպքում, երբ հենց ԱՄՆ-ն է դրդում դա անել, մյուս երկրներն էլ կհետևեն նրանց օրինակին: Ապագայում հնարավոր է, որ այս մասին մտածեն նաև Եվրոպայում:
Ի՞նչ է SWIFT-ը
SWIFT — տեղեկատվության փոխանակման և դրամական փոխանցումների միջազգային միջբանկային համակարգ :
Հայտնի է նաև SWIFT-BIC (Bank Identifier Codes), BIC code, SWIFT ID կամ SWIFT code անուններով: Հիմնադրվել է 1973թ-ին, հիմնադիրներն են՝ 239 բանկեր՝ 15 երկրներից:
SWIFT-ը ստեղծվել է բելգիական օրենսդրության հիման վրա, իսկ միություն կազմի մեջ մտնում են ավելի քան 9 000 բանկեր: Գլխավոր գրասենյակը տեղակայված է Բրյուսելում: SWIFT համակարգից օգտվում են ավելի քան 10 000 կազմակերպություններ, այդ թվում՝ մոտ հազար կորպորացիաներ:
Յուրաքանչյուր անդամ բանկ ունի իր սեփական SWIFT-կոդը: Եվրոպայում վճարում կատարելու համար բավարար է իմանալ բանկի SWIFT-կոդը և ստացողի IBAN-կոդը: Մեկ օրում SWIFT համակարգի միջոցով կատարվում է ավելի քան 1 միլիոն դրամական փոխանցում:
2001թ-ի սեպտեմբերի 11-ի դեպքերից հետո ԱՄՆ ԿՀԳ-ն և Ֆինանսների նախարարությունը SWIFT համակարգին մուտք ստացան: Ամեն տարի SWIFT-ի միջոցով կատարվում են ավելի քան 2,5 մլրդ վճարային գործարքներ:
