Գյումրիում կան շատ ընտանիքներ, որոնք ապրում են տնակում : Տնակում ապրողների ընդհանուր խնդիրը տուն ունենալն է, բայց ամեն ընտանիք նաև իր առանձին խնդիրներն ունի՝ ամեն մեկի ճակատագիրը յուրովի դժվար է դասավորվում, բայց այս մասին միայն խոսելը քիչ է: Գյումրու տնակներից մեկում ապրում է մի տաղանդավոր աղջնակ Նինա Պալյանը, ում մանկության մասին ֆիլմ է նկարահանել ռեժիսոր, սցենարիստ Արմեն Գասպարյանը:
-Արմեն, պատմեք այն մասին, թե ինչո՞ւ որոշեցիք ֆիլմ նկարել այդ աղջնակի մասին:
-Երկրաշարժից անցել է 26 տարի, բայց Գյումրիում տնակում ապրողները դեռ շատ են. սա նշանակում է պետության կողմից ուշադրություն չկա: Ես չէի կարող Գյումրիի մասին ֆիլմ չնկարել, քանի որ ինքս այնտեղից եմ, և ինձ հետաքրքրում է իմ քաղաքի վիճակը: Որոշեցի Նինայի մասին նկարել ֆիլմ, քանի որ իմ ֆիլմի հերոսուհին, բացի տնակային վատ պայմաններում ապրելուց, պետք է արվեստի հետ կապ ունենար, իսկ այդ աղջիկը ջութակահար է:
-Նինան քանի՞ տարեկան է և ո՞ւմ հետ է ապրում
-Նունեն 10 տարեկան է, ապրում է տնակում իր մոր և փոքր եղբայրների հետ: Մայրն աշխատում է 2 տեղ, բայց 40 հազար դրամ է ստանում: Անգամ այդ տնակը, որի մեջ հիմա ապրում են, իրենցը չէ՝ վարձով է: Վարձը 10 հազար դրամ է, իսկ նրանց համար դա բավական մեծ գումար է: Աղջկա կյանքի մասին մարդիկ կարող են պատկերացում կազմել «Գողացված մանկություն» ֆիլմը դիտելով: Երևանում շատերը կարծիք հայտնեցին, որ այս ֆիլմը վարկաբեկում է Հայաստանը, բայց ես ասում եմ՝ սարքեք Գյումրին, և չի վարկաբեկվի, եթե նրանք այդպես են կարծում, ապա ես ֆիլմը տանելու եմ Հայաստանից դուրս ցուցադրելու:
-Հայաստանից դուրս ո՞ր երկրներում կցուցադրվի ֆիլմը
-Մոտակա օրերին մեկնում եմ Վրաստան՝ մասնակցելու «Cine Dok Tbilisi» միջազգային կինոփառատոնին, որից հետո կմեկնեմ Իտալիա «Intimalente» էթնոգրաֆիկ ֆիլմերի միջազգային կինոփառատոնին մասնակցելու: Նաև ասեմ, որ «Filmy Belarusia»-ում ֆիլմը ստացել է «signis» գլխավոր մրցանակը:
-Ի՞նչ է տալու այդ ցուցադրությունները Գյումրիին կամ հերոսուհուն:
-Շատ բան կարող է տալ,և կասեմ, որ արդեն տվել է՝ հերոսուհու կյանքը որոշ չափով փոխվել է:
-Ֆիլմն ի՞նչու անվանեցիք հենց «Գողացված մանկություն»
-Հայաստանում մոտ 600 կազմակերպություն կա, որոնք զբաղվում են երեխաների պաշտպանությամբ, երեխա են փրկում: Որպեսզի երեխային օգնեն, երեխան սոված չքնի՝ հարյուր դրամ է հարկավոր օրեկան հացի համար, բայց չկա: Սակայն, մի 2 հազար դոլար կա, որ մի կարմիր շրթներկով աղջիկ գնա սեմինար անկացնի երեխաների պաշտպանության մասին: Նմանատիպ 10 կազմակերպություն պահվում են 1 երեխայի գողացված մանկության հաշվին:
Մաղթում ենք հաջողություններ ֆիլմին, և կարծում, որ Նինայի կյանքը գնալով ավելի կբարեկարգվի, իսկ այն մարդիկ ում հետաքրքրում է աղջնակը, ապա մեր միջոցով ևս կարող են կապ հաստատել նրա հետ:
Արմինե Բրսոյան
