Ապրիլի 12-ին ԵՊԲՀ-ում տեղի ունեցավ «Սոցիալական առողջություն» թեմայով համաժողով, որի ընթացքում քննարկվեց սոցիալական տարաբնույթ երևույթների ուղղակի և անուղղակի ազդեցությունը մարդկային առողջության վրա:
Ներկայացնում ենք հարցազրույց «Սոցիալական առողջություն» թեմայով համաժողովի մասնակից, ԵԲՀԱ նախագահ, բժիշկ ուռոլոգ Գևորգ Գրիգորյանի հետ:
-Ի՞նչ նպատակով են այսպիսի համաժողովներ կազմակերպվում:
-Համաժողովները կազմակերպում ենք փորձի, տեսակետների փոխանակման, ընդհանուր գիտական մակարդակի բարձրացման համար: Այսօրվա համաժողովի խնդիրներից էր պարզել սոցիալական առողջության մակարդակը Հայաստանում, վեր հանել մեր երկրում դրան սպառնացող վտանգների առանձնահատկություններն ու առաջ քաշել լուծումներ:
-Ի՞նչ հաճախականությամբ են կազմակերպվում այսպիսի համաժողովները:
-Մենք 4 ամսվա ընթացքում արդեն երեք կոնֆերանս ենք արել և կազմակերպել մեկ կլոր սեղան:
-Ինչպե՞ս են ընտրվում համաժողովների թեմաները:
-Թեմաներն ընտրվում են ասոցիացիայի կողմից: Ասոցիացիայում նախաձեռնող խումբը աաջարկում է կազմակերպել որևիցե թեմայով կոնֆերանս, ասոցիացիայի ղեկավարությունը քննարկում է և, եթե հավանություն է տալիս ՝ կազմակերպվում է:
-Ի՞նչ թեմայով զեկույց Դուք ներկայացրեցիք այսօր:
-Զեկույցիս թեման էր «Վերարտադրողական առողջությունը որպես սոցիալ-տնտեսական ցուցանիշ»: Ներկայացրեցի վերարտադրողական առողջությանը վերաբերող աշխարհում առկա խնդիրները, խոսեցի, թե ինչպես է հնարավոր արագ ձերբազատվել այդ խնդիրներից և այլն:
-Հայաստանում անպտղության վերաբերյալ վիճակագրական տվյալներ կա՞ն:
-Ցավոք ես չեմ տիրապետում Հայաստանի ստատիստիկային, սակայն կարող եմ ասել, որ ամբողջ աշխարհում վերարտադրողական առողջության վերաբերող խնդիրները բավականին ծանր վիճակում են գտնվում:
-Արդյո՞ք Հայաստանում տղամարդկանց մոտ վերացել է ուռոլոգներին դիմելու բարդույթը:
-Այդ բարդույթը ոչ թե տղամարդկանց մոտ է, այլ մեր ազգի մենթալիտետի մեջ է: Տղամարդը վախենում է, որ կինը իրեն կսկսի այլ կերպ նայել, եթե ինքը այցելի ուռոլոգի: Սա ավելի շատ հոգեբանական խնդիր է: Ես կողմ եմ, որ անպտղությամբ տառապող զույգերը նախ դիմեն հոգեբանի, հետո նոր՝ բժշկի:
-Մոտ ապագայում այսպիսի համաժողովի կազմակերպում նախատեսվու՞մ է:
Բնականաբար: Այսօրվա կոնֆերանսը կարելի է համարել կայացած, և ես կարծում եմ, որ պետք է կազմակերպել այս նույն թեմայով կոնֆերանսների շարք:
