Արևելյան Եվրոպայում և Կենտրոնական Ասիայում ՄԻԱՎ/ՁԻԱՀ-ի հարցերին նվիրված չորրորդ կոնֆերանսի շրջանակներում մայիսի 12-ին Մոսկվայում կայացավ հանդիպում ՀՀ առողջապահության նախարարի տեղակալ Արման Բաբլոյանի գլխավորած պատվիրակության անդամների և Ռուսաստանի Դաշնության սպառողների իրավունքների պաշտպանության ոլորտում հսկողություն իրականացնող դաշնային ծառայության (Ռոսպոտրեբնադզոր) ղեկավար Աննա Պոպովայի և այլ աշխատակիցների միջև, որին մասնակցում էր նաև ՌԴ վարչապետի օգնական Գենադի Օնիշչենկոն:
Հանդիպման ընթացքում քննարկվեցին վարակիչ հիվանդությունների դեմ պայքարի ոլորտում ՀՀ առողջապահության նախարարության և Ռոսպոտրեբնադզորի միջև համագործակցության վերաբերյալ հուշագրի շրջանակներում համատեղ գործողությունների, ՄԻԱՎ/ՁԻԱՀ-ի և վիրուսային հեպատիտների դեմ պայքարին աջակցության ընթացիկ ծրագրի շրջանակներում համագործակցության հարցեր, ՀՀ առողջապահության նախարարության անունից գնահատվեց ՌԴ-ի կողմից 2009-2013թթ. տրոպիկական հիվանդությունների և պոլիոմիելիտի դեմ պայքարում ցուցաբերված օգնությունը:
ՀՀ առողջապահության նախարարի տեղակալ Արման Բաբլոյանը Հայաստանի կառավարության և առողջապահության նախարարության անունից շնորհակալություն հայտնեց Ռուսաստանի Դաշնության կառավարությանը, Ռոսպոտրեբնադզորին այն անգնահատելի օգնության համար, որը տրամադրվում է Հայաստանին ՄԻԱՎ/ՁԻԱՀ-ի և այլ վարակիչ հիվանդությունների դեմ պայքարի Ռուսաստանի աջակցության ծրագրերի շրջանակներում, ապա նշեց, որ 1995 թվականից ի վեր Հայաստանում պոլիոմիելիտի որևէ դեպք չի արձանագրվել: 2002 թվականից Հայաստանը հայտարարվել է պոլիոմիելիտից զերծ երկիր և մինչ օրս պահպանում է այդ կարգավիճակը: Դրանում իր ներդրումն ունի նաև ՌԴ կառավարությունը՝ ՀՀ առողջապահության նախարարության և Ռոսպոտրեբնադ-զորի միջև համագործակցության վերաբերյալ հուշագրի շրջանակներում տրամադրվող աջակցությամբ: Մասնավորապես նյութատեխնիկական օգնություն է ցուցաբերվել հանրապետության տարածքում պոլիոմիելիտի ախտորոշում իրականացնող լաբորատորիաներին և պատրաստվել են համապատասխան կադրեր: Նա նաև առաջարկեց դիտարկել, որպես օգնություն, հեպատիտ A-ի դեմ պատվաստանյութի տրամադրման հնարավորությունը:
Հանդիպման ընթացքում ՁԻԱՀ-ի ԿՀԿ-ի տնօրեն Սամվել Գրիգորյանը հակիրճ ներկայացրեց ՀՀ-ում ՄԻԱՎ/ՁԻԱՀ-ի հակազդմանն ուղղված Ռուսաստանի Դաշնության աջակցության ծրագրի շրջանակներում արդեն իսկ կատարված աշխատանքները և արդյունքները:
Այնուհետև հայկական կողմը վերահաստատեց 2 մարզային լաբորատորիաների համար ԻՖԱ մեթոդով հետազոտությունների անցկացման համար նախատեսված սարքավորումների, ռեֆերենս լաբորատորիայի որակի արտաքին հսկման համար թեստ-հավաքածուների, լաբորատորիայի համալիր ավտոմատացման ծրագրային ապահովման փաթեթի գնման և Ռոսպոտրեբնադզորի կողմից մատակարարման ՀՀ առողջապահության նախարարության խնդրանքը: Քննարկվեցին նաև իմունային կարգավիճակի որոշման լաբորատոր կոմպլեկտի, թեստ-հավաքածուների և ծախսանյութերի մատակարարման, նաև Մոսկվայում լաբորատոր մասնագետների վերապատրաստման ժամկետների հարցերը:
Ռուսական կողմը խոստացավ մանրամասն քննարկել և հնարավորինս սեղմ ժամկետում արձագանքել:
Հանդիպման մասնակիցները քննարկեցին նաև մինչև 2015 թվականը ԱՀԿ-ի եվրոպական տարածաշրջանում կարմրուկի հաղթահարմանն ուղղված համատեղ քայլերը: 2014-2015 թվականներին Ռոսպոտրեբնադզորը կաջակցի համագործակցող երկրներին, այդ թվում Հայաստանին՝ անհատույց տրամադրելով լաբորատոր սարքավորումներ կարմրուկի ախտորոշում իրականացնող լաբորատորիաներին և վերապատրաստելով համապատասխան մասնագետներ:
Հանդիպման ավարտին մասնակիցները պատրաստակամություն հայտնեցին զարգացնելու երկկողմ համագործակցությունը Արևելյան Եվրոպայի և Կենտրոնական Ասիայի տարածաշրջանում ՄԻԱՎ/ՁԻԱՀ-ի, վիրուսային հեպատիտներին հակազդման գործում:
