Պետբյուջեի նախագծի քննարկման ժամանակ այսօր ԱԺ «Հայ ազգային կոնգրես» խմբակցության քարտուղար Արամ Մանուկյանը Ֆինանսների փոխնախարարին հարցրեց, թե ինչու են որոշել Արարատի մարզին հանրակրթական դպրոցներում սոցիալապես անապահով երեխաների համար սննդի հատկացման և դասագրքերի վարձավճարների փոխհատուցման համար ավելի շատ գումար փոխանցվել, քան մյուս մարզերին միասին վերցրած: Մանուկյանը հարցերց, թե արդյո՞ք դա վարչապետ Հովիկ Աբրահամյանի հետ կապ ունի:
«Արարատի մարզը երկու փոխհատուցման դեպքում էլ առաջին տեղում է, այն դեպքում, երբ Արարատի մարզն իր աշակերտների թվով յոթերորդն է Հայաստանում: Եթե ձեր Կառավարությունը գնում է հավասարեցման քաղաքականությամբ, ապա ինչո՞ւ Արարատի մարզում սոցիալապես անապահով ընտանիքների դասագրքերի վարձավճարների փոխհատուցումը փոխհատուցում 10,5 մլն դրամ է կազմում, որը 10 մարզերի մեջ առաջին տեղում է: Հովիկ Աբրահամյանի գործոնն այստեղ կա՞, թե՞ ոչ»,-ասաց նա և անցավ սննդի թեմային:
«Սնունդ ստանալու է երեք մարզ՝ Արարատ, Սյունիք, Վայոց ձոր, ընդ որում՝ միայն Արարատի մարզի դպրոցական սննդի համար հատկացված է 330 մլն դրամ, այն դեպքում, երբ մնացած բոլոր մարզերի գումարը միասին կազմում է 250 մլն դրամ: Սա ի՞նչ քաղաքականություն է, թվերը կարևոր չէ»,- հարցրեց պատգամավորը և հավելեց թե թվերը շատ խոսուն են, որոնք մեջբերում է բյուջեից:
«Ինչ եք ուզում ասել»,- զարմացավ փոխնախարարը և խնդրեց հստակեցնել, թե ինչ նկատի ունի պատգամավորը հավասարաչափ ասելով: «Ես կարող եմ ասել, որ կան ծրագրեր, որոնք իրականացվում են հավասար չէ, բայց հավասարաչափ: Օրինակ՝ ֆինանսավորում ենք աշակերտների թվի սկզբունքով և մարզերի միջև տարբերություն չկա»,- ասաց նա և նշեց թե ներկայացված թվերն իրականությանը չեն համապատասխանում:
Փոխնախարարը նշեց, թե սննդի ծրագիրը երկար պատմություն ունի։ Արամ Մանուկայնը խնդրեց փոխնախարարին առանց որևէ հեգնանքի պատասխանել և կրկին մեջբերեց թվերը: «Արարատի մազում հավասարաչափի մասին խոսք լինել չի կարող, քանի որ այն մարզերի մեջ ո՛չ ամենից անապահովն է, ո՛չ էլ քանական առումով ամենից շատ աշակերտն ունի: Հստակ է հարցս՝ Հովիկ Աբրահամյանի գործոնը կա՞, թե՞ չկա: Ասեք չկա ու պրծեք»,- նշեց Արամ Մանուկյանը:
Փոխնախարարը պատասխանեց. «Չկա»։ Եվ հավատացրեց, որ ինքը հարցին լուրջ է վերաբերվում: «Ես ասացի, որ Արարատի շրջանում գումարների տարբերությունը պայմանավորված է աշակերտների թվով: Արարատի մարզում 14 062 աշակերտի թվով է պլանավորված, Սյունիքում 6097 և Վայոց ձորում՝ 2583: Այս ծրագիրը ՀՀ վարչապետ Հովիկ Աբրահամյանի հետ որևէ առնչություն չունի»,-ասաց նա:
Արամ Մանուկյանն արձագանքեց. «Շատ լավ, դիտարկենք, որպես ամենաանապահով սոցիալական մարզը՝ Շիրակը հանած»: «Ո՛չ, պարո՛ն Մանուկյան, սա պիլոտային ծրագիր է և ընդգրկելու է նաև մյուս մարզերը, ուղղակի հաջորդականությունն այսպես է նախատեսված»,-պատասխանեց փոխնախարարը:
Դասագրքերի հարցով էլ փոխնախարարն ասաց, որ բոլոր մարզերի 5-12–րդ դասարանների աշակերտների թիվը կփոխանցի, և պատգամավորը կտեսնի, որ Արարատի մարզում աշակերտների թիվն ավելի շատ է:
Արամ Մանուկյանը տեղից կրկին արձագանքեց, թե ստիպված է տեղեկացնել, որ փոխնախարարը ներկայացնում է ծրագրով նախատեսված աշակերտների թիվը, մինչդեռ ինքը բերում է ընդհանուր աշակերտների թիվը, իսկ այդ ընդհանուր թվով Արարատը առաջին տեղում չէ:
