Անհատ հետազոտող Արծվի Ալեքսանյանը գտնում է, որ հայոց այբուբենը մարդու կողմից ստեղծված չէ, այն ավելի բարձր քաղաքակրթության արդյունք է: Եվ Մեսրոպ Մաշտոցը ոչ թե ստեղծել, այլ փրկել է նախաստեղծ այբուբենը կործանումից:
«Մեր լեզվի մեջ մի անբացատրելի մաթեմատիկական կառույց կա: Այբուբենը գիտելիքների շտեմարան է շատ ավելի հարուստ, քան մի մեծ ոսկու հանք: Օրինակ՝ մեր այբուբենում արդեն կա նոտաների թվային ամբողջ պատկերը, այն հրաշագործ փայտիկի հզորություն ունի և միայն ազգային չէ, սա ողջ մարդկության համար է մի կառույց, որն ասելիք ունի»,- այսօր կայացած ասուլիսին ասաց հետազոտողը, ով արդեն 40 տարի զբաղվել է այդ գործով:
Վերջինիս խոսքով՝ հայոց այբուբենը մի կառույց է, որի անգամ մի տառի տեղափոխությունից մեխանիզմը չի աշխատի: «Օրինակ՝ Ր-ն կառուցվածքային առումով կարևոր դեր ունի մեր այբուբենում: Նրա փոփոխություններից մենք ստանում ենք այբուբենի բոլոր տառերը: Բացի այդ, Ր-ից առաջ մեր այբուբենի առաջին տառը դնելով, մենք ստանում ենք Ար աստծո անունը, որի հակառակը եգիպտական Ռա աստվածն է»,- ասաց Արծվի Ալեքսանյանը՝ հավելելով, որ իր բացահայտումներին հավատալու համար այբուբենը նա փորձել է բացել ճշգրիտ գիտությունների միջոցով. «Այբուբենը տեղադրեցի երկրաչափական եռանկյունու մեջ: Տեղավորելով եռանկյունու երեք անկյուններում՝ ես հասկացա, որ անկյուններում հայտնված տառերով կազմվում է ասք բառը, որը նշանակում է ասելիք, որը ռուսերենում՝ «սկազկան» է, անգլերենում՝ «ասկ»՝ հարցնել: Բացի այդ, այբուբենի երկձայները, եռաձայներն ու միաձայները իրար կապելով, ես ստացա եռանկյունաչափության հինգ կարևոր եռանկյունները, իսկ դա պատահական լինել չէր կարող»:
Նրա խոսքով՝ հայոց այբուբենը լավ ուսումնասիրելու և գաղտնազերծելու դեպքում, շատ նորանոր գաղտնիքներ կբացահայտվեն, հասու կլինեն շատ գիտությունների, որոնք առ այսօր բացահայտված չեն:
