Կառավարության նիստին այսօր ՀՀ տնտեսական մրցակցության պետական պաշտպանության հանձնաժողովի նախագահ Արտակ Շաբոյանը ներկայացրեց կատարած ուսումնասիրությունները՝ շուկայական դիրքի չարաշահումների ու անհիմն թանկացումների վերաբերյալ: Նա նշեց, որ առանձնացրել են այն ապրանքային շուկաները, որոնք գտնվում են հանձնաժողովի տեսադաշտում:
«Հանձնաժողովը հետևում է խոշոր ընկերությունների վարքագծին, որպեսզի թույլ չտա դրանց կողմից հակամրցակցային գործողություններ: Հանձնաժողովն ուսումնասիրել է թվով 16 ապրանքներ, որոնք կենսական նշանակություն ունեն, դրանք են՝ շաքարավազ, կարագ, սուրճ, հավի միս, հավի ձու, ձեթ, ալյուր և այլն»,- ասաց նա:
Արտակ Շաբոյանի խոսքով՝ ուսումնասիրությունը կատարվել է նոյեմբերի սկզբից մինչ դեկտեմբերի 10-ն ընկած ժամանակահատվածը:
«Այս ժամանակահատվածում հայկական դրամի փոխարժեքը արժեզրկվել է շուրջ 13%-ով` ԱՄՆ 1 դոլարի նկատմամբ 411-ից հասնելով 463 դրամի։ Արժեզրկումն իր անմիջական ազդեցությունն է թողել ներմուծված ապրանքների գների վրա, որոնց գինը սկսել է բարձրանալ նոյեմբերի 20-ից սկսած»,- ասաց նա՝ ավելացնելով, որ արդյունքում գնաճն ազդել է նաև տեղական արտադրության ապրանքների վրա:
ՏՄՊՊՀ նախագահն ընդգծեց, որ տեղական արտադրության ապրանքներից իրենց ուշադրության կենտրոնում է գտնվում հատկապես կաթնամթերքը:
«Բնականաբար փոխարժեքը կարող է իր ազդեցությունը թողնել կաթնամթերքի գների բարձրացման վրա, քանի որ կաթնամթերքի ինքնարժեքի մեջ մտնող որոշ բաղադրիչներ ներմուծվում են, բացի այդ, ձմռան ամիսներին ՀՀ-ում կաթնամթերքի արտադրության ծավալները կտրուկ նվազում են, ինչն էլ իր ազդեցություն է թողնում կաթնամթերքի գների վրա»,- ասաց նա և ընդգծեց, որ կաթնամթերքի շուկայում արտադրանքի գինը բարձրացրել են «Աշտարակ կաթն» և «Դուստր Մարիաննան»:
Արտակ Շաբոյանը նշեց, որ տարակարծություններից խուսափելու համար չի ցանկանում գնային փոփոխությունները ներկայացնել, քանի որ նույն ապրանքի գծով կարող են տարբեր գներ արձանագրվել՝ կախված տարբեր չափանիշներից:
«Այնուհանդերձ, այն ապրանքատեսակները, որոնց գծով ուսումնասիրություն է կատարվել, դրանց գնային փոփոխությունները տատանվում են 2-13%-ի միջակայքում, այն դեպքում, երբ փոխարժեքի արժեզրկումը կազմել է 13%, կարելի է ասել, որ մեծ հաշվով գնային տատանումները համահունչ են փոխարժեքի տատանումներին»,- ասաց նա: