«7 մեղք, 7 բույր» խորագրով վերջերս ներկայացվեց հայկական արտադրության նոր յոթ օծանելիք պատրաստված մեր բնաշխարհի բազմահարուստ բույրերից: Օծանելիքի բույրերին ի հավելում հեղինակները ցուցադրեցին ներկայացում և 7 կտավ՝ 7 մեղքի և ներդաշնակ համակեցության մասին: Նախագծի հեղինակ և պրոդյուսերը Գուժ Թադևոսյանն է, իսկ կտավների և օծանելիքի հեղինակը՝ Արման Մանուկյանը, ում հետ էլ www.analitik.am-ը մանրամասն զրուցեց «7 մեղք, 7 բույր» նախագծի մասին:
-Ինչպե՞ս առաջացավ հայկական օծանելիք ստեղծելու միտքը:
-Հայկական պարֆյում ստեղծելու մտահղացում վաղուց ունեի, և ցանկությունս նաև պայմանվորված էր նրանով, որ հայկական բնաշխարհը լի է հետաքրքիր բույսերով և ծաղիկներով:
-Ի՞նչ ծաղիկներ ու բույսեր եք օգտագործել օծանելիքը ստանալու համար:
-Բացառապես հայական տեղական բույսերից և ծաղիկներից են ստացվում հոտերը, իհարկե, որոշակի նյութեր դրսից են բերված, իսկ պատրաստման տեխնոլոգիան ֆրանսիականն է, քանի որ Ֆրանսիան օծանելիքի կենտրոնն է համայն աշխարհում: Հայկական բույսերից օրինակ ռեհան, բայց մնացածը չեմ կարող ասել, քանի որ գաղտնիք է:
-Սա Ձեր առաջի՞ն փորձն է օծանելիք ստեղծելու գործում:
-Ոչ, ես երկար տարիներ է զբաղվում եմ այս գործով, պատվերով անհատական բույրեր եմ ստեղծել, բայց հայկական շարք առաջին անգամ եմ ներկայացնում: Այս 7-ից երկուսը առավոտյան բույրեր են, երկուսը՝ ցերեկային, երկուսը՝ երեկոյան, իսկ մեկը հավելում է, որը կարելի է օկտագործել մնացած վեց բույրերի հետ:
-Իսկ եթե Հայաստանից դուրս առաջարկ ստանաք վաճառել բաղադրատոմսը և այն չհամարվի Ձերը, կհամաձայնե՞ք:
-Համաշխարհային մակարդակով դա ընդունելի և նորմալ տարբերակ է, դեռ առաջարկ չկա, բայց եթե լավ առաջարկ լինի՝ կմտածեմ:
-Հայկական մրգերից, օրինակ ծիրանից, օծանելիք պատրաստելու միտք ունեցե՞լ եք:
-Մրգերից ոչ, հենց ծիրանից եթերային յուղ ստանալ դժվար լինի, բայց դրա փոխարեն հայկական բուսականությունն ու ծաղիկներն են լավը:
-Լավ, իսկ կտավներն ինչո՞ւ որոշեցիք յոթ մեղք անվանել և ինչո՞ւ հենց մեղքերի թեմային անդրադարձաք:
-Ինձ վաղուց էր հուզում այդ թեման: Այն մտել էր իմ մեջ ու որևէ կերպ պետք է դուրս գար, և այս դեպքում արտահայտումը եղավ կտավների տեսքով: Ես անընդհատ էսքիզներ էի անում, և հանկարծ ինքն իրեն ստացվեց: Բարին ու չարը միշտ էլ հետաքրքրում են ինձ, և կյանքում ամեն ինչ երկու հակառակ կողմ ունի՝ բարի և չար, սև և սպիտակ, տղամարդ և կին, այդ հակառակ բևեռների նման էլ միտք առաջացավ յոթ մեղք ներկայացնող կտավ, որոնց ի հակառակ կլինեն յոթ «բարի» բույր: Ամեն մի կտավը մի մեղք է մարմնավորում, իսկ Գուժը միացրել է բույրը, կտավը և ներկայացումը: Այս ամենը մարդկանց մի հաղորդագրություն է, որ մի պահ կանգ առնեն և վերլուծեն իրենց կյանքը, ապրելակերպը:
Արմինե Բրսոյան
