-Ինչպե՞ս եք պատկերացնում Եվրասիական միության ապագան, արդյոք այն կենսունակ է գործունեության համար:
Եվրասիական միության հիմքում դրված է նախկին Խորհրդային Միության հանրապետությունների միավորման գաղափարը մեկ տնտեսական գոտում: Ռուսաստանը հնարավորություն է տալիս նախկին հանրապետություններին լուծել իրենց առջև ծառացած տնտեսական, ռազմական, քաղաքական խնդիրները, իսկ ԵՄ-ն մեզ տնտեսական, ռազմական խնդիրների լուծման հնարավորություն չի տալիս: Եթե վերցնենք Ուկրաինան, Բելառուսը, Վրաստանը և այլ հանրապետություններ, պարզվում է, որ բացի Ադրբեջանից, Թուրքմենիայից, որոնք տիրապետում են նավթային պաշարների, մյուս պետությունները ունեն լրջագույն տնտեսական խնդիրներ, այդ պատճառով մեր պրոբլեմների միակ լուծումը այսօր կարելի է տեսնել Եվրասիական միության կազմում:
- Ինչպե՞ս եք մեկնաբանում այն, որ Հայաստանը ՄՄ-ի համապարփակ համաձայնագիրը չստորագրելով ընդգրկվում է Եվրասիական միության մեջ:
Հայաստանն այն ճանապարհը, ինչ-որ պետք է անցներ ՄՄ-ին անդամակցելու համար, արդեն անցել է: Ստեղծվել է ճանապարհային քարտեզ, և մեծ հաշվով էական չէ՝ ստորագրած կմտնենք, թե ոչ: Մոտ ապագայում Հայաստանը կմիանա Եվրասիական միությանը, այսինքն՝ կմիանա կոնկրետ պայմանագրերին: Կա 19 պայմանագիր և այլ իրավական ակտեր, որոնց հիման վրա Հայաստանը հնարավորություն է ստանում էներգակիրները ձեռք բերել զեղչված գներով, քանի որ ՄՄ-ում չեն գործելու արտահանման և ներկրման մաքսային տուրքեր, ավելին ասեմ, դեռեւս չանդամակցած ՄՄ-ին, այլ միայն այդ մասին հայտարարելուց հետո, ՌԴ-ն Հայաստանին մատակարարվող գազի գինը իջեցրեց 30%-ով:
-Ո՞րն է ՄՄ և Եվրասիական միության տարբերությունը:
-Եթե Մաքսային Միությունը վերաբերում է միայն մաքսային ոլորտին, ապա Եվրասիական միությունը ինտեգրացիայի ավելի բարձր մակարդակ է: Անդամ երկրների քաղաքական և տնտեսական կապերն ավելի են սերտանալու: Կարելի է ասել, որ Եվրասիական միությունը Եվրոպական միության այլընտրանքն է:
-Ինպիսի՞ն է լինելու Հայաստանի քաղաքական և տնտեսական կարգավիճակը Եվրասիական միության շրջանակներում:
-Եվրասիական միությունը Հայաստանին հնարավորություն է տալիս լուծել տնտեսական ոլորտում առկա խնդիրները արդյունաբերության բացակայության, էներգիակիրների թանկ լինելու և շրջափակման պայմաններում, չմոռանանք, որ այսօրվա իրավիճակում մենք ունենք արտաքին շուկա դուրս գալու դժվարություններ: Բացի այդ, Հայաստանն անդամակցելով Եվրասիական միությանը ավելի բարձր մակարդակով է ապահովելու Հայաստանի անվտանգությունը, որն էլ ուղղակիորեն նպաստելու է երկրի տնտեսության զարգացմանը:
-Ինչպիսի՞ ազդեցություն կունենա Հայաստանի անդամակցումը Եվրասիական միությանը՝ ԼՂՀ հակամարտության կարգավորման հարցում:
-Դա կհանգեցնի պատերազմի սպառնալիքի նվազեցմանը և Հայաստանի անվտանգության բարձրացմանը, որն էլ պատերազմի վերսկսումը դարձնում է գրեթե անհնար: Բացի այդ Հայաստանի անդամակցումը Եվրասիական միությանը կնպաստի ԼՂՀ-ի տնտեսության զարգացմանը:
-Ինչպես կմեկնաբանեք Ջեյմս Ուորլիքի արած հայտարությունը:
-ԱՄՆ-ն ղարաբաղյան հակամարտության ողջ ընթացքում փորձել է փոխել ստատուս քվոն՝ Հայաստանի հաշվին: Եթե արցախյան հակամարտությանը նայենք այն տեսանկյունից, թե Հայաստանը ի՞նչ խնդիր ունի լուծելու, և Ադրբեջանը՝ ի՞նչ, ապա մեր խնդիրը ՝ Ղարաբաղի անվտանգությունն է և նրա կարգավիճակը: Մենք պայքարել ենք դրա համար, հաղթանակ ենք տարել պատերազմում, որն, ի դեպ, սկսել էր Ադրբեջանը, ազատագրել ենք տարածքներ և ստեղծել ենք անվտանգության գոտի:
Այս պարագայում ԱՄՆ համանախագահը չի խոսում կարգավիճակի մասին, նա հայտարարում է, որ Ադրբեջանին պետք է վերադարձվեն տարածքները: Իսկ Ղարաբաղի կարգավիճակը պետք է հստակեցվի անորոշ ապագայում իրականացվելիք հանրաքվեով: Ուորլիքի հայտարարությունից կարելի է ենթադրել, որ ԱՄՆ-ի շահերը համընկնում են Ադրբեջանի և Թուրքիայի շահերի հետ: ԱՄՆ-ն միշտ էլ հայտարարել է, որ ստատուս քվոն լուծում չէ, բայց եթե այդ լուծումը մեզ չի առաջարկվում, ի՞նչ են առաջարկում ՝ հանձնե՞նք Ղարաբաղն այսքան ձեռքբերումներից հետո:
ԱՄՆ-ն հետապնդում է երկու նպատակ՝ ԼՂՀ-ի անվտանգության հաշվին ապահովել կասպյան էներգիակիրների անխափան մատակարարումը դեպի Եվրոպա, և երկրորդ՝ հակամարտության գոտում տեղակայելով միջազգային խաղաղապահ ուժեր՝ մեծացնել իր քաղաքական ազդեցությունը Հարավային Կովկասում:
-Ինչպե՞ս կարձագանքի ԵՄ-ն Հայաստանի՝ Եվրասիական միությանն անդամակցմանը:
Մեծ հաշվով Եվրամիությունը հաշտվել է այդ փաստի հետ, չնայած որ փորձում էր պարտադրել Հայաստանին «կամ-կամ»-ի քաղաքականություն, որը Հայաստանին ուղղորդեց դեպի Եվրասիական միություն: Դեռ ավելին, Եվրամիությունը դեմ չէ, որ Հայաստանը ստորագրի Եվրաասոցացման համապարփակ համաձայնագրի քաղաքական հատվածը:
-Ինչպիսի՞ ազդեցություն կունենա Ֆրանսիայի նախագահի այցը հայ-ֆրանսիական հարաբերությունների հետագա զարգացման վրա:
-Նախ և առաջ Ֆրանսուա Օլանդի այցը տարածաշրջան առնչություն չունի ԼՂՀ հակամարտության լուծման հետ: Հայ-ֆրանսիական հարաբերությունները և՛ տնտեսական, և՛ քաղաքական ոլորտում միշտ ջերմ են եղել: Այս այցը ավելի շուտ փորձ է էլ ավելի ջերմացնել երկու երկրների միջև եղած հարաբերությունները և նոր թափ հաղորդել հայ-ֆրանսիական տնտեսական համագործակցությանը: