Հանրապետական կուսակցության խորհրդի նիստում երեկ ՀՀ նախագահ Սերժ Սարգսյանը խիստ քննադատություն հնչեցրեց «Բարգավաճ Հայաստան» կուսակցության նախագահի հասցեին՝ ընդգծելով, որ «Գագիկ Ծառուկյան քաղաքական դերակատարը երկրի համար դարձել է չարիք»։
Այս թեմայի շրջանակում analitik.am-ը զրուցել է «Ազգային անվտանգություն» կուսակցության նախագահ Գառնիկ Իսագուլյանի հետ:
- Պարոն Իսագուլյան, երեկ նախագահի կողմից խիստ գնահատականներ հնչեցին Գագիկ Ծառուկյանի և նրա կուսակիցների հասցեին: Ի՞նչ եք կարծում, կոպիտ չէ՞ր նրա ելույթը…
- Մեկ բառով ասած` դա նախագահին վայել ելույթ չէր, և անկեղծ ասած, փորձում եմ ինքս ինձ համոզել, որ դա սադրանք էր հենց նախագահի նկատմամբ, որը կազմակերպել էր նրա շրջապատը և խնդիր ուներ իշխանական լծակները իրենց ձեռքում հետայսու ևս պահպանել:
- Նախագահն ասաց, որ երկար ժամանակ իմացել, սակայն չի անդրադարձել Ծառուկյանի գործողություններին, որոնք բավականին ոչ ժողովրդանպաստ տարրեն են պարունակում: Դրանք երկար ժամանակ «հանդուրժելուց» և լռելուց հետո, ի՞նչ եք կարծում, ինչո՞ւ որոշվեց այսօր բարձրաձայնել այդ մասին։
- Նախ ասեմ, որ նախագահն իր ասելիքին որպես հիմնավորում բերեց փողոցային խոսակցությունները, որոնց ուշադրություն դարձնելու անհրաժեշտություն չկար, այն է` բոլոր այն մեղադրանքները, որ հնչել են պարոն Ծառուկյանի հասցեին, իրականության հետ որևէ կապ չունեն և հետևանք են այն բանի, որ պարոն Ծառուկյանը չի համաձայնել իշխանությունը պահպանելու նրանց ծրագրերին:
- Երեկ բոլոր հանրապետականները մի մարդու պես պաշտպանում էին նախագահի տեսակետը,նրանցից ոմանք ԲՀԿ առաջնորդին համեմատեցին «քաղաքական հիվանդության» հետ, անվանեցին «կեղծ քաղաքական երևույթ», «չարիք» և այլն : Ինչպե՞ս եք վերաբերվում սրան:
- Ելնելով նրանց ելույթներից, այնպիսի տպավորություն ստացա, որ իրենք են պարտադրել Հանրապետության նախագահին այդ ոճով հանդես գալու: Թե ինչքանով է դա համապատասխանում իրականությանը, դատեք ինքներդ, բայց անկեղծ ասած, դա ինձ համար երկրորդական նշանակություն ունի: Ես նրանց չեմ դիտարկում որպես ինքնուրույն քաղաքագետներ կամ քաղաքական գործիչներ, իսկ նմանների ասածները մեկնաբանության կարիք չունեն:
- Երեկ ուղղակիորեն սպառնալիք հնչեց նաև Ծառուկյանին պատգամավորական լիազորությունից զրկելու վերաբերյալ…
- Պարոն Ծառուկյանը, կարծում եմ, այդ հարցի պատասխանը այսօր իր ելույթում շատ հստակ տվեց, իսկ եթե հանրապետականը նախաձեռնի նման անօրինական գործունեություն, ապա դա ահազանգ է բոլորիս, որ վաղը նույն ուղտը մեր դռանն է չոքելու: Ուստի դա սպառնալիք էր ոչ թե Ծառուկյանին, այլ համայն հայ ժողովրդին:
- Նաև տեսակետներ հնչեցին, որ այս ամենը տանում է նրան, որ Ծառուկյանին «նստացնեն», որից հետո նոր կհայտարարվի սահմանադրական փոփոխությունների մասին…
- Ասում են` ախորժակը ուտելուց է բացվում: Ուստի ազգովի պետք է թույլ չտանք, որ տեղի ունենա նման անօրինականություն:
- Կարելի՞ է համարել, որ սա պատերազմ է երկու կուսակցությունների միջև:
- Ոչ, սա պատերազմ է Հանրապետական կուսակցության և հայ ժողովրդի միջև, և բոլորին է հայտնի, թե ինչով են ավարտվում նման պատերազմները:
Հասմիկ Մովսիսյան
