ԱԳ նախարար Էդվարդ Նալբանդյանը դեկտեմբերի 18-ին ընդունել է Ռուսաստանի, Ուկրաինայի, Եվրասիայի հարցերով ԱՄՆ պաշտպանության քարտուղարի փոխտեղակալ Էվելին Ֆարկասին։
ԱԳՆ մամուլի ծառայությունից հայտնում են, թե, ողջունելով հյուրին նախարար Նալբանդյանը գոհունակությամբ նշել է, որ հայ-ամերիկյան գործընկերությունը տարբեր բնագավառներում, ներառյալ պաշտպանական եւ անվտանգության ոլորտը, վերջին տարիներին դինամիկ կերպով զարգանում է, եւ առկա են նախադրյալներ դրանց ընդլայնման համար։
Շնորհակալություն հայտնելով ընդունելության համար` Էվելին Ֆարկասն ասել է, որ Միացյալ Նահանգները կարեւորում են Հայաստանի հետ պաշտպանական բնագավառներում փոխգործակցության զարգացումը, եւ իր այցելությունը միտված է դրա առավել ամրապնդմանը։
Հանդիպման ընթացքում անդրադարձ է կատարվել Հայաստանի մասնակցությանը միջազգային խաղաղապահ գործունեությանը, եւ կարեւորվեց Աֆղանստանում եւ Կոսովոյում խաղաղապահ առաքելություններին Հայաստանի ունեցած ներդրումը:
Քննարկվել են Հայաստան-ՆԱՏՕ հարաբերությունները։
Արտգործնախարարն անդրադարձել է նաեւ տարածաշրջանում սպառազինությունների վերահսկման խնդիրներին, մասնավորապես տարածաշրջանային խաղաղության պահպանման համար Եվրոպայում Սովորական սպառազինությունների պայմանագրի արդիականացման կարեւորությանը։
ՀՀ արտաքին քաղաքական գերատեսչության ղեկավարն ընդգծել է, որ Հայաստանն ակտիվորեն մասնակցում է զանգվածային ոչնչացման զենքի, միջուկային, քիմիական եւ կենսաբանական զենքի չտարածման, ահաբեկչության դեմ պայքարի միջազգային նախաձեռնություններին:
Հյուրի խնդրանքով նախարար Նալբանդյանը ներկայացրել է ղարաբաղյան հիմնախնդրի կարգավորման գործընթացի վերջին զարգացումները, տարածաշրջանային խնդիրների վերաբերյալ Հայաստանի մոտեցումները։
