Այսօր` մայիսի 6-ին, ՏՄՊՊՀ նիստում հրապարակվեցին Երևանի քաղաքապետարանի կողմից շինաշխատանքների իրականացման նպատակով հայտարարված մրցույթների ուսումնասիրության արդյունքները։ Հանձնաժողովի որոշմամբ, մի շարք մրցույթներում, որոնց մասնակցել է շուրջ 144 ընկերություն, մրցակցային օրենսդրության հնարավոր խախտման առնչությամբ հարուցվեց վարչական վարույթ:
Նիստի ընթացքում անդրադարձ է եղել ասֆալտապատման աշխատանքների իրականացման համար հայտարարված և շենքերի ֆասադների նորոգման ու քարերի մաքրման աշխատանքների համար մրցույթներին:
Ըստ Արտակ Շաբոյանի ղեկավարած կառույցի` Երևանի քաղաքապետարանի կողմից իրականացված մրցույթային աշխատանքները կրել են ձևական բնույթ:
ՏՄՊՊՀ-ն` ի դեմս Արտակ Շաբոյանի կատարել է մեծածավալ անդրադարձ Երևանի քաղաքապետարանի կատարած աշխատանքի վերաբերյալ` ներկայացնելով այն հիմնականում բացասական կողմից:
Արտակ Շաբոյանը, ով բավականին հաճախ հանդես է գալիս անտրամաբանական հայտարարություններով, արի ու տես, որ չի մոռացել մանրազննին ուսումնասիրության ենթարկել Երևանի քաղաքապետ Տարոն Մարգարյանի կատարած աշխատանքը:
Շաբոյանն օրինակ կարծում է, որ ՀՀ-ում չկան մենաշնորհներ, կան գերիշխող դիրք ունեցողներ: Թե որն է այս երկուսի միջև առկա տարբերությունը, երևի թե նա էլ հստակ չի պատկերացնում: Փոխարենը ՏՄՊՊՀ նախագահը լավ գիտի սևացնել պետական կառույցների աշխատանքները: Զեկույցը, որը ներկայացվել է հանրությանը, անկասկած միակողմանի ուսումնասիրության հետևանք է:
Անզեն աչքով էլ երևում է, որ նպատակը եղել է ստվերել Երևանի քաղաքապետի գլխավորությամբ տարված աշխատանքները: Շաբոյանը իր ղեկավարած կառույցի «աչքի գերանը թողած», ուրիշի «աչքի փուշը» փնտրելով է տարված:
Կարճ ժամանակ է անցել Շաբոյան-պատգամավորներ խորհրդարանական հակամարտությունից, երբ պատգամավորների հարցերի տարափից և արդար դիտարկումներից նա չէր կարողանում սթափվել և միայն ադեկվատության կոչեր էր անում:
Ի վերջո բնավ էլ կարևոր չէ, թե որ կազմակերպությունն ասֆալտապատեց կամ վերանորոգեց շենքերի ֆասադները: Կարևորն այն է, որ ամբողջ Երևանն է տեսնում կատարված աշխատանքի արդյունքները:
Չնայած, ո՞վ գիտե` գուցե մրցույթից դուրս մնացած կազմակերպությունները Շաբոյանի բարեկամ-հարազատներն են և հենց դրանո՞վ է պայմանավորված վերջինիս «անկեղծ» անհանգստությունը:
Աղբյուր՝ Shabat.am
