Հոկտեմբերի 30-ին ԵՊՀ արհեստակցական կազմակերպությունը ԵՊՀ աշխատողների հիմնական աշխատավարձը 20 տոկոսով բարձրացնելու համար առաջարկություն էր ներկայացրել ԵՊՀ ռեկտորի ժամանակավոր պաշտոնակատարին և ԵՊՀ հոգաբարձուների խորհրդի անդամներին: Հաջորդ օրը սակայն ԵՊՀ պաշտոնական կայքից և ֆեյսբուքյան էջից անհետացել էին ԵՊՀ աշխատողների աշխատավարձը 20 տոկոսով բարձրացնելու վերաբերյալ նյութերը:
ԵՊՀ մամուլի խոսնակ Գևորգ Էմին-Տերյանն Analitik.am-ին ասաց, որ ԵՊՀ կայքից ԵՊՀ ռեկտորի հրահանգով ինքն է հեռացրել համալսարանականների 20 տոկոս աշխատավարձը բարձրացնելու վերաբերյալ նյութերը:
ԵՊՀ արհեստակցական կազմակերպության նախագահ Արմեն Ավետիսյանն Analitik.am-ի հետ զրույցում նշեց, որ ԵՊՀ ռեկտորը դեռևս չի պատասխանել համալսարանականների աշխատավարձերի 20 տոկոս բարձրացման առաջարկությանը:
«Իհարկե ջնջելով կայքից, մեր առաջարկությունը չի ջնջվում, կայքէջն ընդամենը կայքէջ է և լուսաբանել են մեր առաջարկությունը: Դրանով ոչինչ չի փոփոխվում և դա հարցի լուծում չէ»,-ասաց նա:
Ըստ Ավետիսյանը, կայքն ընդամենը գրաքննություն է արել, խախտել է ինֆորմացիայի ազատության մասին օրենքն ու ինֆորմացիայի ստացման իրավունքը:
«Համալսարանական միջավայրին ոչ հարիր պահվածք են դրսևորել»,- շեշտեց Ավետիսյանը:
Ըստ նրա, գուցե ջնջել են, որ համալսարանում այդ հարցով որևէ քննարկում չլինի, սակայն վստահեցրեց, որ համալսարանի կայքով չէ, որ քննարկումներ են լինում, մամուլն ընդհանրապես անդրադարձել է իրենց առաջարկին և այն ուժի մեջ է:
«ԵՊՀ կայքում տեղադրել կամ չտեղադրելը չի կարող որևէ ազդեցություն ունենալ կամ խոչընդոտ լինել ԵՊՀ հոգաբարձուների խորհրդի նիստում արհեստակցական միության առաջարկության քննարկումներին»,-հաղորդեց ԵՊՀ արհեստակցական միության նախագահը:
Արհեստակցական միությունը կսպասի ԵՊՀ հոգաբարձուների առաջիկա խորհրդի նիստին և կարող է իր առաջարկությունները ներկայացնել:
«Եթե մեր առաջարկությունը չընդունեն՝ թող ԵՊՀ աշխատակիցները հետևություն անեն, որ ԵՊՀ ռեկտորի պաշտոնակատարը ցանկանում է ռեկտոր դառնալ, սակայն չի ցանկանում համալսարանականների աշխատավարձերը բարձրացնել»,- շեշտեց ԵՊՀ արհեստակցկան միության նախագահը:
Գոհար Ստեփանյան
