ՀՀ Ազգային ժողովի պետական-իրավական հարցերի ու ֆինանսավարկային եւ բյուջետային հարցերի մշտական հանձնաժողովների համատեղ նիստում Հովհաննես Սահակյանի եւ Գագիկ Մինասյանի նախագահությամբ նոյեմբերի 3-ին քննարկվել են «ՀՀ 2016թ-ի պետական բյուջեի մասին» ՀՀ օրենքի նախագծով իշխանության օրենսդիր, գործադիր եւ դատական մարմինների գործունեության իրականացման համար նախատեսված ծախսերը:
ՀՀ ֆինանսների նախարարի առաջին տեղակալ Պավել Սաֆարյանը, ներկայացնելով ֆինանսական ցուցանիշները, տեղեկացրել է, որ 2016թ-ի պետական բյուջեի նախագծով իշխանության ճյուղերի պահպանման ծախսերի համար նախատեսվել է հատկացնել 91 մլրդ 719 մլն դրամ, որը 688 մլն դրամով գերազանցում է 2015թ-ի մակարդակը: Ավելացված ծախսերից 109 մլն դրամը հատկացվելու է աշխատավարձի բնականոն աճի բարձրացմանն ուղղված միջոցներին եւ հաստիքների ավելացմանը:
Պարոն Սաֆարյանը նշել է, որ ավելացված ծախսերը ներառում են նաեւ ծառայողական ավտոմեքենաները. այս տարի կառավարությունը ձեռք է բերել 4 նոր ավտոմեքենա: Նրա խոսքով՝ պետական կառավարման համակարգում ավտոմեքենաների ընդհանուր թիվը հասել է 1072-ի:
324 մլն դրամով ավելացել են նաեւ էներգակիր ծառայություններին ուղղված միջոցները, ինչը պայմանավորված է էլեկտրաէներգիայի սակագնի բարձրացմամբ:
ՀՀ Նախագահի աշխատակազմի ղեկավար Վիգեն Սարգսյանը ներկայացրել է 2016թ-ի պետական բյուջեի նախագծով նախատեսված որոշ ֆինանսական ցուցանիշներ: Ըստ այդմ՝ ՀՀ Նախագահի աշխատակազմի բյուջեն ծրագրված է 4 մլրդ 558 մլն 321 հազար դրամ` ինչն ընթացիկ տարվա համեմատ նվազել է 22 մլն 430 հազար դրամով:
Պարոն Սարգսյանը նշել է, որ Հանրային կապերի եւ տեղեկատվության կենտրոն ՊՈԱԿ-ի համար 2015թ-ի համեմատությամբ 2016թ-ին նախատեսվել է 17 մլն դրամով ավելի գումար: Այն կապված է ՊՈԱԿ-ի՝ նոր մասնաշենք տեղափոխվելու եւ կոմունալ ծախսերի հետ:
Հետբուհական եւ մասնագիտական կրթության գծով նպաստների տրամադրում եւ հետբուհական մասնագիտական կրթություն ստացող ուսանողների կրթակաթոշակ ծրագրով ՀՀ պետական կառավարման ակադեմիա ՊՈԱԿ-ին տրամադրվող գումարը նախորդ տարվա համեմատությամբ 2016 թվականին կավելանա է 1 մլն 800 հազար դրամով՝ կազմելով 164 մլն 50 հազար դրամ: Այն պայմանավորված է էլեկտրաէներգիայի սակագնի բարձրացմամբ:
Խոսելով ոչ ֆինանասական ցուցանիշների մասին՝ Վիգեն Սարգսյանը նշել է, որ 2016թ-ին նախատեսվում է իրականացնել ՀՀ օրենքների նախագծերի 496 մասնագիտական փորձաքննություն, 219 լեզվա-ոճական փորձաքննություն, ՀՀ միջազգային պայմանագրերի շուրջ 210 մասնագիտական փորձաքննություն եւ տեղեկանքների ներկայացում:
ՀՀ Նախագահի աշխատակազմի ղեկավար Վիգեն Սարգսյանը տեղեկացրել է նաեւ, որ ՀՀ Նախագահի այցերի, արտերկրից ժամանող պետությունների ղեկավարների, բարձրաստիճան պետական պաշտոնյաների, պաշտոնական պատվիրակությունների ընդունելությունների նախապատրաստումը, ինչպես նաեւ ՀՀ Նախագահի՝ մարզեր կատարած այցելությունների կազմակերպումը եւս մեծածավալ եւ պատասխանատու աշխատանք է պահանջում:
ՀՀ ԱԺ աշխատակազմի ղեկավար-գլխավոր քարտուղար Հրայր Թովմասյանը տեղեկացրել է, որ 2016թ-ի պետական բյուջեի նախագծով խորհրդարանի գործունեության իրականացման համար նախատեսված ծախսերն ու եկամուտները կկազմեն 4 մլրդ 653 մլն 833 հազար դրամ:
ԱԺ աշխատակազմի եւ պատգամավորների պահպանում ծրագրով նախատեսվել է հատկացնել 4 մլրդ 407 մլն դրամ, վարչական օբյեկտների հիմնանորոգման համար՝ 90 մլն, միջազգային կազմակերպություններին ՀՀ անդամակցության վճարներ ծրագրով՝ 155 մլն եւ ԱԺ աշխատակազմի պետական ծառայողների վերապատրաստման ծրագրով՝ 1 մլն 272 հազար դրամ:
Պարոն Թովմասյանը նշել է, որ 2016թ-ի պետական բյուջեն վերոնշյալ 4 ծրագրերի գծով 2015թ-ի համեմատությամբ ավելացել է 106 մլն 161 հազար դրամով. 822 հազար դրամ ավելացել է միջազգային կազմակերպություններին անդամակցության ծրագրով, 43 հազար դրամ ավելացել է կապի եւ էլեկտրաէներգիայի գծով, իսկ 34 մլն դրամ ավելացել է պետական պաշտոն զբաղեցնող աշխատակիցների աշխատավարձի բնականոն աճի համար:
ԱԺ աշխատակազմի ղեկավար-գլխավոր քարտուղարն անդրադարձել է նաեւ մի քանի խնդիրների: Նրա խոսքով՝ խորհրդարանում շահագործվում են այնպիսի համակարգիչներ, որոնք արդեն ենթակա են փոխարինման: Դրա համար անհրաժեշտ է 70 մլն դրամ: 20 մլն դրամ էլ անհրաժեշտ է ԱԺ տարածքում տեղակայված, սակայն համապատասխան ծառայության կողմից շահագործվող Պետական պահպանության գումարտակի զորանոցի վերանորոգման աշխատանքների համար: Եվ որպեսզի այս եւ նմանատիպ մի քանի խնդիրներ լուծում ստանան, պարոն Թովմասյանն առաջարկել է 2016 բյուջեում լրացուցիչ հատկացնել 300 մլն դրամ:
ՀՀ կառավարության աշխատակազմի ղեկավար-նախարար Դավիթ Հարությունյանը նշել է, որ կառավարության աշխատակազմի տարբեր վարչությունների միջոցով անմիջականորեն մատուցվող ծառայությունները եւ այլ քաղաքական միջոցառումները, որոնց գծով եւս կան կատարողականներ ու չափորոշիչներ, նշված են 2016թ-ի բյուջեի նախագծում: Այնուամենայնիվ՝ պարոն Հարությունյանը նշել է, որ գալիք տարվա բյուջեի նախագիծը շատ չի տարբերվում նախորդ տարիների թվային ցուցանիշներից: Այստեղ եւս գումարի զգալի մասը հատկացվում է աշխատավարձերին, էներգետիկ ծառայությունների վարձավճարներին, գործուղումներին եւ այլն:
Մյուս ոլորտների պատասխանատուները եւս նշել են, որ 2016թ-ին բյուջեի նախագծով նախատեսվող ֆինանսական ծախսերի եւ եկամուտների մեծ մասը հատկացվելու է աշխատավարձերի բնականոն աճին եւ էլեկտրաէներգիայի վարձավճարին: Նրանք տեղեկացրել են, որ ընթացիկ տարվա համեմատությամբ` եկող տարվա ծախսերն ավելանում են գրեթե միայն այդ պատճառով:
