Ստամբուլ քաղաքի փողոցներ են կիրակի դուրս եկել հազարավոր ցուցարարներ, որոնք բողոքել են համացանցի վերահսկողությունն է՛լ ավելի խստացնող նոր օրենքի ընդունման դեմ։
Ինչպես նշում է Daily Mail-ը, ոստիկանները ցուցարարներին դիմավորել են ջրցան մեքենաներով, ինչին ի պատասխան նրանց ուղղությամբ քարեր են նետվել։
Ցուցարարներն իրենց ձեռքերում պահել են բազմաթիվ պաստառներ, որոնց վրա գրված է եղել, որ կաշառքն ու կոռուպցիան Թուրքիայում ամենուր են։ Նրանց կարծիքով՝ խորհրդարանի ընդունած նոր օրենքով կառավարությունը փորձում է կասեցնել վերջերս վարչապետ Ռեջեփ Թայիփ Էրդողանի ու մի քանի այլ պաշտոնյաների շուրջ ծագած կոռուպցիոն սկանդալի տարածումը համացանցի միջոցով։
Նոր օրենքով նախատեսվում է թույլ տալ կայքերի արգելափակում նախքան դատավարությունները, իսկ պրովայդերներին ստիպել պահպանել օգտատերերի մասին տեղեկությունները:
Հիշեցնենք, որ անցյալ տարի Ստամբուլի Գեզի զբոսայգում ծառահատումներ իրականացնելու թուրքական իշխանությունների որոշումը փողոց էր դուրս բերել հազարավոր մարդկանց։ Ցույցերը վերաճել էին հակակառավարական ակցիաների։
