Երևանի քաղաքապետ Տարոն Մարգարյանի նախաձեռնությամբ մայրաքաղաքում տրանսպորտային երթևեկությունն ու հետիոտնային անցուդարձն առավել անվտանգ դարձնելու նպատակով 2012 թվականից կառուցվում են վերգետնյա անցումներ: 2014 թվականին կառուցված երեք անցումներում կատարված աշխատանքներին հետևել է Երևանի քաղաքապետի տեղակալ Դավիթ Օհանյանը: Քաղաքապետի տեղակալը նշել է, որ այս նախաձեռնության համար համայնքային բյուջեից գումար չի ծախսվել, քանի որ գաղափարը կյանքի է կոչվում Երևանի քաղաքապետարան-մասնավոր հատված համագործակցության արդյունքում և այդ համագործակցության լավագույն օրինակներից է: Ծրագրի մեկնարկից մինչ օրս կառուցվել է ընդհանուր առմամբ վերգետնյա 14 անցում, որոնցից 3-ը`2014 թվականին,մայրաքաղաքի Կիևյան և Չարենցի փողոցներում, ինչպես նաև Թբիլիսյան խճուղում: Կիևյան փողոցի վերգետնյա անցումը գտնվում է Երևանի քաղաքապետարանի համար 63 հիմնական դպրոցի հարևանությամբ: Դավիթ Օհանյանը զրուցել է դպրոցի աշակերտների, ծնողների և տարածքի բնակիչների հետ և հորդորել խնամքով վերաբերվել համայնքային գույքին: Վերջիններս էլ շնորհակալություն են հայտնել անվտանգ անցուդարձ ապահովելու համար և պարտավորվել օգտվել միայն վերգետնյա և սահմանված վայրերում նշագծված անցումներից: 2015 թվականին վերգետնյա անցումների կառուցման հարցում ևս հաշվի կառնվեն բնակիչների կարծիքներն ու առաջարկությունները: Վերգետնյա անցումները կշարունակվեն տեղակայվել այն վայրերում, որտեղ քաղաքաշինական առումով որևէ խնդիր չեն առաջացնի:
Երևանի քաղաքապետարանի տեղեկատվության
և հասարակայնության հետ կապերի վարչություն
