Մարտի 1-ից մեկնարկել են մայրաքաղաքի վարչական շրջաններով անցնող գետերի ու ջրանցքների հուների մաքրման աշխատանքները: Այս մասին տեղեկացնում է Երևանի քաղաքապետարանի տեղեկատվության և հասարակայնության հետ կապերի վարչությունը:
Գործընթացի հիմնական նպատակը բարձրադիր գոտիների ձյան հալոցքի, գարնանային տեղումների դեպքում հնարավոր հեղեղումներից խուսափելը, ինչպես նաև ջրային զանգվածի անխոչընդոտ հոսք ապահովելն է:
Մաքրման աշխատանքները նաև սանիտարահիգիենիկ նշանակություն ունեն, քանի որ արդյունքում հատկապես ամռան ամիսներին կանխվում է հարակից բնակելի թաղամասերում տհաճ հոտի տարածման հավանականությունն ու վարակների տարածումը:
Կուտակված աղբը հենց տեղում հատուկ տեխնիկայով տեղափոխվում է աղբավայրեր: Մաքրման աշխատանքների ավարտին գետերն ու ջրանցքները մաքրաջրվում են ուժեղ ճնշման ջրաշիթերով: Գետերի ու ջրանցքների հուների մաքրման աշխատանքները կտևեն մինչև ապրիլի 15-ը:
