ԱՄՆ-ում բնակվող մեր հայրենակից, Հոլիվուդում հայտնի դերասան, պրոդյուսեր բազմաթիվ ֆիլմերում տարբեր կերպարներ մարմնավորած Քեն (Գեղամ) Դավիդյանը գործընկերոջ՝ Արսեն Բաղդասարյանի հետ այս օրերին Հայաստանում են՝ մի շարք ծրագրերով:
Քեն Դավիդյանը 100-ից ավելի կերպարներ է մարմնավորել, սկզբնական շրջանում` հիմնականում երկրորդական («Հաճախորդը միշտ մահացած է», «Միայնակը», «Կարմիր արևածագը» և այլն): 2006 թվականին նկարահանված «Բորատ» ֆիլմի գլխավոր հերոսներից մեկի կերպարը շրջադարձային դեր ունեցավ Քեն Դավիդյանի համար, ինչպես ինքն է ասում` նոր դուռ բացեց և դարձավ դերասանական կարիերայի կարևորագույն քայլերից մեկը:
Քեն Գեղամ Դավիդյանի մայրը ԱՄՆ-ում է ծնվել: Ծնողները Գյումրիից են, 1920 թվականին հաստատվել են Լոս Անջելեսում և սկսել են աղբահանության գործով զբաղվել: Հայրը Հայաստանի Արևշատ գյուղից է: Ծառայել է խորհրդային բանակում, մասնակցել պատերազմին, գերեվարվել: Հայերի համար հատուկ ճամբար կար, որտեղ գերիները տարբեր աշխատանքեր էին կատարում` կոշիկներ, շապիկներ և այլ իրեր էին կարում: Շուրջ 1000 հայ կար այնտեղ, նրանք ազատ շրջում էին, բայց ճամբարի սահմաններից դուրս գալ չէին կարող:
Եվ ահա նրա հայրը այդ ճամբարում էր: Երբ ամերիկացիները գնացել են, նրան անմիջապես նկատել է գեներալներից մեկը, քանի որ հայրը շատ լավ արդուկում էր: Ամերիկացի գեներալը Քենի հորը տեղեկացրել է, որ Ջորջ Մարտիկյանը մի խումբ մարդկանց ԱՄՆ է տանում, կցանկանա՞ արդյոք գնալ: Հայրը համաձայնում է: Նախ հաստատվել է Բոստոնում, ապա Լոս Անջելեսում, որտեղ էլ ծանոթացել է նրա մոր հետ: Հայրը շարունկել է պապի աղբի գործը ՝ այն ավելի ընդլայնելով: Լավ են ապրել, ապահովված էին, սակայն դժվար աշխատանք էր: Նա հանգամանքների բերումով մորական տատիկի հետ է ապրել:
