Երկար ժամանակ ցանկացել եմ նկարահանել Հայոց ցեղասպանության մասին պատմող ֆիլմ, այնպիսի ֆիլմ, որը հայկական իրականությունը ներկայացնող ռեզյումե կլիներ:
Այս մասին այսօր լրագրողների հետ հանդիպման ժամանակ հայտնեց ֆրանսիահայ կինոռեժիսոր, դերասան Ռոբեր Գեդիգյանը, ում «Խենթ պատմություն» ֆիլմով նախօրեին բացվեց «Ոսկե ծիրան» 12-րդ երևանյան միջազգային կինոփառատոնը:
Ֆիլմը պատմում է Հայոց Ցեղասպանության հետեւանքով Ֆրանսիա գաղթած մի հայ ընտանիքի ժառանգորդի մասին, ով փափագում է վրեժ լուծել թուրքերից և, ի վերջո, դառնում է «ԱՍԱԼԱ»-ի անդամ: Ֆրանսիայում թուրք դեսպանի դեմ Արամի իրականացրած մահափորձի ժամանակ վիրավորվում է մի ֆրանսիացի երիտասարդ` զրկվելով իր ոտքերից: Արամի ընտանիքն իմանում է այդ մասին և փորձում ամեն կերպ օգնել երիտասարդին:
«Հարկավոր էր պատմել Հայոց ցեղասպանության մասին, հայ մոր կերպարի մասին, ով ֆիլմի մեջ ընդունում է իր որդու զոհողությունը, իսկ հետո մի փոքր գլոբալացնելով ֆիլմը՝ հայի պատմությունը դարձնել պատմություն մի ողջ ազգի»:
Գեդիգյանը նշեց, որ «Խենթ պատմություն» ֆիլմը ներկայացվել է միայն Կաննի կինոփառատոնում, նոյեմբերին այն կցուցադրվի ֆրանսիայում, իսկ հաջորդը` Կանադայում, Իտալիայում, Իսպանիայում, Բելգիայում, ինչպես նաև ասիական ու սկանդինավյան երկրներում:
Նշենք, որ ֆրանսիացի ռեժիսոր, դերասան, սցենարիստ և պրոդյուսեր Ռոբեր Գեդիգյանը գլխավորում է «Ոսկե ծիրան»-ի միջազգային խաղարկային մրցույթի ժյուրին:
