Հայաստանի գործատուների միության նախագահ Գագիկ Մակարյանը Անալիտիկ մամուլի ակումբում այսօր հրավիրված ասուլիսին ասաց, որ իրենք ուսումնասիրություն, հարցումներ են իրականացրել՝ պարզելու համար, թե որոնք են ՓՄՁ-ների խնդիրը և պարզել են, որ ՓՄՁ քաղաքականությունը շեշտակի փոփոխության կարիք ունի:
Հարցին, թե որ ոլորտներում է տեղի ունեցել անկում, հարցվածների 53%-ը նշել է առևտրի ոլորտում: Գագիկ Մակարյանն ասաց, որ առևտրի ոլորտի անկումը պայմանավորված է երկու պատճառով, առաջին՝ բնակչության թվաքանակի անկումն է, և երկրորդ պատճառը՝ սպառողական հնարավորությունների, գնողունակության նվազումն է:
Ինչ վերաբերում է դրական ցուցանիշներին՝ նա ասաց, որ հարցվածները հիմնականում զարգացում նկատել են սննդի արտադրության ոլորտներում, տեխնոլոգիաների, տուրիզմի ոլորտներում:
Անդրադառնալով ԵՏՄ-ին Հայաստանի անդամակցությանը՝ նա ասաց, որ խնդիրները շարունակում են մնալ: Գագիկ Մակարյանի տեղեկացմամբ՝ հարցվածների 40-45%–ը պետության քաղաքականությունը ՓՄՁ-ների նկատմամբ անբավարար է գնահատել:
