Հայաստանում տեղի կունենա երիտասարդական գիտական կոնֆերանս «Փորձաքննական տվյալների բազայի ձեւավորման կազմակերպչական եւ գիտագործնական փորձի ուսումնասիրությունը «Փորձաքննությունների ազգային բյուրոյում», դրանց համեմատությունը հանրապետությունում գոյություն ունեցող դատափորձաքննական տվյալների բազայի հետ: ՀՀ-ում դատափորձաքննական տվյալների բազաների ինտեգրման նախադրյալները եվրոպական դատափորձաքննական տվյալների բազաների հետ» թեմայով: Կոնֆերանսը կազմակերպվել է պետական ոչ առեւտրային «Փորձաքննությունների ազգային բյուրո» կազմակերպության կողմից՝ ՀՀ Գիտությունների ազգային ակադեմիայի 70-ամյակի առթիվ:
NEWS.am-ի փոխանցմամբ՝ ՓԱԲ-ի մամուլի քարտուղար Լանա Մշեցյանը հայտնել է, որ միջոցառումը կազմակերպվում է Հայաստանի երիտասարդական հիմնադրամի եւ ԳԱԱ-ի Երիտասարդական խորհրդի աջակցությամբ: Կոնֆերանսը տեղի կունենա դեկտեմբերի 3-4-ին Աղվերանում: Սպասվում է դատափորձաքննական կառույցների, իրավական ոլորտի մարմինների, գիտահետազոտական կենտրոնների, բուհերի ներկայացուցիչների ակտիվ մասնակցություն: Հատկանշական է, որ տվյալ գիտական կոնֆերանսում գերակշռում են երիտասարդ գիտնականները, փորձագետները, մասնագետները, ինչը լավատեսություն է ներշնչում Հայաստանում գիտական հանրության զարգացման հեռանկարների առումով: Շատ կարեւոր են հետագա զարգացումները, քանի որ թույլ են տալիս օգտագործել եվրոպական փորձաքննական կենտրոնների հնարավորությունները, փոխանակվել տեղեկատվությամբ, անցկացնել ուսումնասիրություններ եւ այլն: Կոնֆերանսի բացումը տեղի կունենա դեկտեմբերի 3-ին, ժ. 10.45-ին, ՀՀ ԳԱԱ-ի շենքում:
