Ազգային Ժողովի «Հանրապետական» խմբակցության պատգամավոր Սուքիաս Ավետիսյանը, այսօր հրավիրված մամուլի ասուլիսին անդրադառնալով սահմանադրական բարեփոխումների հրապարակված նախնական նախագծին, ասաց, որ սահմանադրական բարեփոխումները երեք հիմնական խնդիր են լուծում:
«Առաջինը՝ մարդու իրավունքների իրական արտահայտությունն է Սահմանադրության նախագծի մեջ և իրականում, որի վերաբերյալ Վենետիկի հանձնաժողովը դրական գնահատական է տվել: Երկրորդը՝ կառավարման համակարգի փոփոխության խնդիրն է, իսկ երրորդը՝ դատական իշխանության անկախության ավելի շատ բարձրացումը, ինչը մեր իրականության մեջ տեղիք է տվել տարբեր խոսակցությունների»,- ասաց նա:
Ըստ նրա՝ մեր հասարակության մեջ ի սկզբանե, երբ ինչ-որ բան հրապարակվում է, առանց հիմնավորումների բացասական գնահատականներ է տրվում:
Ասուլիսին ներկա կառավարման փորձագետ Հարություն Մեսրոբյանը կարծիք հայտնեց, որ մեզ մոտ ոչ թե այնքան խնդիր կա, թե ինչ է գրված Սահմանադրության մեջ, այլ, թե այն մեզ մոտ իրագործվո՞ւմ է, թե՞ ոչ :
«Մեզ մոտ խնդիրը տեքստը չէ, Հայաստանում քսանհինգ տարի է Սահմանադրության կատարման խնդիր կա»,- ասաց նա՝ նշելով, որ կառավարման բոլոր համակարգերը՝ կիսանախագահական, խորհրդարանական, նախագահական, սպառել են իրենց:
«Բոլոր այդ երեք տեսակի կառավարման համակարգերը անարդյունավետ են»,-ասաց նա և նշեց, որ կատարվող փոփոխությունը մի անհաջող կառավարման համակարգից անցնում է երկրորդ համակարգ:
Ինչ վերաբերում է դատական իրավունքի անկախությանը և մարդու իրավունքների պաշտպանությանը, նա ասաց, որ Հայաստանում համար մեկ խնդիրն այն է, որ օրենքները, ենթաօրենսդրական ակտերը չեն կատարվում:
