ՀՀ կրթության եւ գիտության նախարարությունում տեղի է ունեցել նախարարության Ներքին աուդիտի կոմիտեի անդրանիկ նիստը, որը վարել է կոմիտեի նախագահ, ՀՀ կրթության եւ գիտության նախարար Արմեն Աշոտյանը: Նիստի օրակարգում ընդգրկված էր` Ներքին աուդիտի 2015թ. տարեկան ծրագրով նախատեսված մի շարք ՊՈԱԿ-ներում եւ հիմնադրամներում իրականացված համակարգի գնահատման աուդիտի հաշվետվությունների քննարկումը: Նշվել է, որ համապատասխան ուսումնասիրություններ են իրականացվել 30 կազմակերպությունում /2 բուհ, 14 նախնական եւ միջին մասնագիտական ուսհաստատություն, 14 դպրոց/: Հիմք ընդունելով բացահայտված թերությունները` կոմիտեն քննարկումների արդյունքում առաջարկել է` վերոնշյալ ուսհաստատությունների տնօրենների նկատմամբ կիրառել կարգապահական տույժեր, մասնավորապես, երկու տնօրենի նկատմամբ` խիստ նկատողություն, 9-ի` նկատմամբ` նկատողություն, մնացածի նկատմամբ` նախազգուշացում:
Իրականացված ուսումնասիրությունների արդյունքում պարզվել է, որ թերությունների եւ խախտումների հիմնական պատճառը հանրակրթության եւ ՄԿՈՒ ոլորտում պատասխանատուների մասնագիտական ցածր պատրաստվածությունն է, իսկ բուհերում` օրինականության պահպանման խնդիրը:
Այդ համատեքստում նախարար Արմեն Աշոտյանը համապատասխան ստորաբաժանմանը հանձնարարել է բուհերում նախատեսվող աուդիտի ընթացքում ուսումնասիրել բյուջետային հատկացումների, գնումների, մրցույթների անցկացման օրինականության, զեղչային համակարգի կիրառման հետ կապված խնդիրները: Հանրակրթության եւ ՄԿՈՒ ոլորտում տնօրենների մասնագիտական պատրաստվածության բարձրացման նպատակով նախարարը հանձնարարել է տնօրենների հավաստագրման հարցաշարում ընդգրկել տվյալ գործընթացներին վերաբերող համապատասխան հարցեր:
Բացի այդ, կոմիտեն որոշել է`
- համապատասխան հանձնարարականներ տալ տվյալ կազմակերպությունների տնօրեններին՝ ձեռնարկել միջոցառումներ բացահայտված թերությունների եւ բացթողումների շտկման, ինչպես նաեւ դրանք բացառելու ուղղությամբ,
- հանձնարարել կազմակերպությունների տնօրեններին՝ գործողությունների ծրագրով սահմանված ժամկետների ավարտից հետո 10-օրյա ժամկետում նախարարին ներկայացնել տեղեկատվություն` ծրագրի կատարման ընթացքի վերաբերյալ,
- հանձնարարել աշխատակազմի Ներքին աուդիտի վարչությանը` իրականացնել մոնիթորինգ կազմակերպություններում հաճախակի կրկնվող թերությունների ու բացթողումների վերաբերյալ, առաջարկել համակարգային լուծումներ,
- հանձնարարել աշխատակազմի ներքին աուդիտի վարչությանը` ամփոփել ստացված տեղեկատվությունը եւ Ներքին աուդիտի կոմիտեի հաջորդ նիստին ներկայացնել ամփոփ տեղեկատվություն` կատարված աշխատանքների վերաբերյալ:
