ՀՀ քննչական կոմիտեի Սյունիքի մարզային քննչական վարչության վարույթում քննվող քրեական գործով պարզվել են 4 անձի մահվան պատճառ դարձած ավտովթարի մի շարք հանգամանքները, միջոցներ են ձեռնարկվում՝ երթեւեկության կանոնները խախտելու մեջ մեղադրվող 36-ամյա Ալեն Հովհաննիսյանին հայտնաբերելու ուղղությամբ։
Ավելի վաղ տեղեկացրել ենք, որ 2015թ. հուլիսի 23-ին` ժամը 12:45-ին, Մեղրի-Երեւան ավտոճանապարհի 168-րդ կմ հատվածում տեղի է ունեցել ավտովթար, որի հետեւանքով 4 անձ մահացել է, 3-ը՝ ստացել մարմնական վնասվածքներ։
Դեպքի առթիվ Սյունիքի մարզային քննչական վարչության վարույթում հարուցվել է քրեական գործ` ՀՀ քրեական օրենսգրքի 242-րդ հոդվածի 3-րդ մասի հատկանիշներով՝ Ճանապարհային երթեւեկության եւ տրանսպորտային միջոցների շահագործման կանոնները խախտելը, որն անզգուշությամբ առաջացրել է երկու կամ ավելի մարդու մահ:
Նախաքննությամբ պարզվել է, որ Կապանի 36-ամյա բնակիչ Ա.Հովհաննիսյանը Մեղրի-Երեւան ավտոճանապարհի 168-րդ կմ հատվածում իր կողմից վարած «Մերսեդես-Բենց E320» ավտոմեքենայով դուրս է եկել հանդիպակաց երթեւեկելի գոտի, այնուհետեւ՝ ձախ կողնակ եւ բախվել «Օպել Վեկտրա» մակնիշի ավտոմեքենային, որի հետեւանքով վերջինիս վարորդը՝ Ս.Պողոսյանը, ուղեւորներ Ա.Գասպարյանը, Ք.Գասպարյանը եւ 4-ամյա Մ.Ալեքսանյանն ստացած մարմնական վնասվածքներից տեղում մահացել են, իսկ մյուս ուղեւորները՝ Գ.Գասպարյանը, Ա.Ալեքսանյանը եւ Հ.Ալեքսանյանը, տարբեր աստիճանի մարմնական վնասվածքներով տեղափոխվել են Աղիտուի զինվորական հոսպիտալ:
Հաշվի առնելով ԶԼՄ-ների հետաքրքրությունը՝ Քննչական կոմիտեից տեղեկացնում են, որ նախաքննությամբ ձեռք բերված ապացույցների համակցությամբ՝ հուլիսի 28-ին որոշում է կայացվել Ա.Հովհաննիսյանին ներգրավել որպես մեղադրյալ՝ ՀՀ քրեական օրենսգրքի 242-րդ հոդվածի 3-րդ մասի (Ճանապարհային երթեւեկության եւ տրանսպորտային միջոցների շահագործման կանոնները խախտելը, որն անզգուշությամբ առաջացրել է երկու կամ ավելի մարդու մահ) եւ 244-րդ հոդվածի (ճանապարհատրանսպորտային պատահարի վայրը թողնելը) հատկանիշներով:
Նրա նկատմամբ հայտարարվել է հետախուզում, միջոցներ են ձեռնարկվում՝ նրան հայտնաբերելու ուղղությամբ։
