ԱՄՆ-ի Առեւտրի նախարարությունը որոշել է 2015-ի սեպտեմբերի 30-ին համացանցի կրիտիկական ենթակառուցվածքի վերահսկողությունը չփոխանցել հասարակությանը եւ մեկ տարով երկարաձգել Դոմենային անունների եւ IP հասցեների կառավարման կորպորացիայի` ICANN-ի հետ իր պայմանագիրը, գրում է The Wall Street Journal-ը:
«Կառավարությունը նախատեսում է մեկ տարով` մինչեւ 2016-ի սեպտեմբերի 30-ը երկարաձգել ICANN-ի հետ պայմանագիրը», - հայտարարել է ԱՄՆ-ի Առեւտրի նախարարի տեղակալ Լոուրենս Սթրիկլինգը, փոխանցում է Ինտերֆաքսը:
Նման որոշման հիմք է դարձել այն, որ համացանցային հանրությունը չի հասցնում նշված ժամկետում կոնսոլիդացված առաջարկ ներկայացնել ICANN-ի գործառույթներն իրեն փոխանցելու վերաբերյալ:
Ավելի վաղ ԱՄՆ-ի Առեւտրի նախարարը հայտարարել էր, որ կրիտիկական ենթակառուցվածքի կառավարումը համաշխարհային հանրությանը կփոխանցի միայն բազմաշահառուական մոդելի հիման վրա` բոլոր մասնակիցների շահերը հաշվի առնելով` եւ համացանցային հանրության, եւ բիզնեսի, եւ պետությունների: Բայց այն պայմանով, որ երաշխավորվի համացանցի կառավարմանը որեւէ պետության կամ խմբի միջամտության բացառումը:
