«12 տարվա ստրկություն» ամերիկյան ֆիլմը, որի ռեժիսորն է բրիտանացի Սթիվ ՄքՔուինը, արժանացել է Կինոքննադատների լոնդոնյան խմբակի մրցանակին՝ որպես տարվա լավագույն ֆիլմ, հայտնում է ИТАР-ТАСС-ը։
Ֆիլմը հիմնված է 19-րդ դարում գրված հիշողությունների վրա, որոնց հեղինակը Սոլոմոն Նորթափն է՝ ազատ սևամորթ ամերիկացի, ով առևանգվում է Նյու Յորք նահանգում և ստրկության վաճառվում ԱՄՆ հարավային նահանգներում։ Այս ֆիլմը համարվում է «Օսկար» մրցանակի գլխավոր թեկնածուներից մեկը՝ «Տարվա լավագույն ֆիլմ» անվանակարգում։
Տարվա լավագույն արտասահմանյան ֆիլմ է ճանաչվել ֆրանսիացի ռեժիսոր Աբդելատիֆ Քեշիշի «Ադելի կյանքը» ֆիլմը։
Լավագույն վավերագրական ֆիլմ է ճանաչվել ամերիկացի ռեժիսոր Ջոշուա Օփենհայմերի «Սպանության ակտ» ֆիլմը։
Տարվա լավագույն բրիտանական ֆիլմ է ճանաչվել «Հսկա եսասերը», իսկ լավագույն սցենարիստներ են ճանաչվել Էթան և Ջոել Քոենները։
«Տարվա լավագույն դերասան» անվանակարգում հաղթել է բրիտանացի Չիվեթել Էջիոֆորը՝ «12 տարվա ստրկություն» ֆիլմում գլխավոր դերի համար։ Իսկ տարվա դերասանուհի է ճանաչվել Քեյթ Բլանշետը՝ «Հասմիկ» ֆիլմի համար։
