Ուկրաինայի ՆԳՆ ղեկավար Արսեն Ավակովը Facebook սոցիալական ցանցի իր էջում հայտնել է, որ իրավապահ մարմինները Գերագույն Ռադայի դիմաց բողոքի ցույցի մոտ 30 մասնակցի են ձերբակալել
«Արդեն 30 մարդ ձերբակալված է: Դեռ էլի կլինեն: Նռնակ նետողին ենք բռնել. նրանց նռնակներն առգրավվել են, այդ թվում նաև՝ առավելագույն հեռահարությամբ Ֆ-1-ը»:
Ավակովի տվյալների համաձայն, մոտ 90 մարդ վիրավորվել է, որոնցից մի քանիսը ծանր վիճակում են:
Ավելի վաղ հայտնել էինք, որ Ուկրաինայի Գերագույն Ռադայի մոտ բախումներ են տեղի ունենում ցուցարարների և իրավապահների միջև:
Ըստ TASS գործակալության՝ որոշ ցուցարարներ փայտերով ծեծել են իրավապահների, կիրառել արցունքաբեր գազ:
Գերագույն Ռադայի մուտքն արգելափակված է:
Նշվում է, որ բողոքի պատճառը երկրի սահմանադրության մեջ մտցված ուղղումներն են, որոնք առաջացրել են հանրության զայրույթը:
Օգոստոսի 31-ին հայտնի է դարձել, որ Գերագույն Ռադան առաջին ընթերցմամբ ընդունել է ուղղումներ երկրի սահմանադրությունում՝ իշխանության ապակենտրոնացման մասով:
