Տեղեկատվական անվտանգության փորձագետ Սամվել Մարտիրոսյանը լրագրողերի հետ հանդիպման ընթացքում «Ինֆորմացիոն հիգիենայի հիմնական կանոնները» թեմայով ասաց, թե խնդիրներն աճում են, իսկ դրա վերաբերյալ հասարակությանը կրթելու հարցում ոչ ոք չի զբաղվում:
«Վերջին ժամանակներում բավական պարկեշտ մարդիկ իրենց ընկերների պատերին տեղադրում էին ոչ պարկեշտ նկարներ, ու շատերի համար անհայտ էր մնում, թե դա որտեղից է հայտնվել»,- ասաց Սամվել Մարտիրոսյանը:
Նրա խոսքով՝ այս տարվա ընթացքում հայտնվել են որոշ «կրիպտո» վիրուսներ, որոնք համաճարակի են նման: Դրանք ներթափանցում են համակարգիչ՝ կոդավորում են ֆայլերը, և օգտատերը չի կարողանում օգտվել իր ֆայլերից:
Բանախոսն ասաց նաև, որ Հայաստանի դեմ հայերեն գրված sms-ներ են օգտագործվում, որոնցով փորձում են մարդկանցից գումարներ կորզել:
«Խնդիրն այն է, որ ինտերնետից օգտվողները վերջին 2-3 տարում են շատացել, և նրանք շատ տարրական կանոններից օգտվել չգիտեն»,- ասաց Սամվել Մարտիրոսյանը՝ նշելով, թե մարդիկ հաճախ գաղտնաբառ օգտագործելիս շատ պարզ, հասարակ բառեր են օգտագործում, ընդհուպ այսպես՝ 123456, կամ նույնիսկ գրում են այսպես՝ password:
«Հակերային խմբեր կան, որոնք փորձում են հասարակությունների ունակությունները պաշտպանել: Պետք է հասկանալ, որ մեզ մոտ վտանգները շատ արագ են թափանցում: Վերջին ալիքն այն է, որ մարդիկ հաճախ ինչ-որ բաներ են տարածում ինչ-որ կայքից, սակայն բացելով տվյալ կայքը, հանդիպում ես մեկ այլ պատուհանի, որը պահանջում է ներբեռնել, ու այդ ալիքը սկսում է արագորեն տարածվել: Դա, իհարկե, այդքան էլ մեծ վտանգ չէ, բայց անհանգստություն է պատճառում: Այստեղ անհանգստանալու առիթն այն է, որ եթե այդ մեթոդն աշխատում է, ուրեմն տվյալ տարբերակով կարող են տարածվել նաև կրիպտո վիրուսները»,- ասաց տեղեկատվական անվտանգության մասնագետը:
