«Նոր Սահմանադրության մեջ կստեղծվի խորհուրդ, որը պատգամավորների բացակայությունների բեռը ոչ թե կդնի ԱԺ նախագահի վրա, այլ խորհուրդն ինքը կորոշի հարգելի՞ է, թե՞ ոչ հարգելի: Իսկ այս պահին միանձնյա որոշումներ են՝ ինչպես կգտնի ԱԺ նախագահը, այդպես էլ կլինի»,- այսօր Ազգային ժողովում ճեպազրույցի ժամանակ հայտարարեց ԱԺ նախագահ Գալուստ Սահակյանը` անդրադառնալով պատգամավորների բացակայությունների խնդրին:
Լրագրողները հետաքրքրվեցին մասնավորապես ԱԺ պատգամավոր, ԲՀԿ նախկին նախագահ Գագիկ Ծառուկյանի բացակայություններով, որոնք ուսումնասիրությունից հետո համարվեցին հարգելի: ԱԺ նախագահը ասաց, որ միշտ էլ ուշադրություն է դարձնում Ծառուկյանի բացակայություններին, իսկ ուսումնասիրությունների արդյունքը դրական էր, քանի որ դրանք հարգելի համարվեցին:
Լրագրողը նկատեց, որ ստացվում է` Գագիկ Ծառուկյանը պատգամավոր է դարձել հարգելի բացակայելու համար, ԱԺ նախագահը արձագանքեց. «Ես չգիտեմ՝ Գագիկ Ծառուկյանը պատգամավոր դարձել է հարգելի բացակայելու համար, կամ չէ, բայց Ծառուկյանը այն անձնավորությունը չի, որ պիտի կարողանաս հենց այնպես միտումնավոր խոսքեր ասես: Կա քաղաքական իրավիճակներ, կա դրա հետևանքները, կա դրա մոտեցումները, կա նաև այն պատճառաբանությունր, որ ներկայացնում են ԱԺ նախագահին և համոզումը մնում է ԱԺ նախագահի մոտ»:
Հարցին, թե նորմա՞լ է, որ Գագիկ Ծառուկյանը աշխատավարձ է ստանում բյուջեից, բայց բացակայում է երկար ժամանակ ու չի ներկայանում նիստերին, ԱԺ նախագահը պատասխանեց. «Ես կարծում եմ, որ դա աննորմալ չէ: Նա բավականին լուրջ ներդրումներ է կատարում և խոսել, որ նա աշխատավարձ է ստանում և պետության վրա շատ թանկ է նստում, չեմ կարծում: Էդ հարաբերակցությունը այդ երկու իմաստների կշիռները ավելի շատ խոսում են Ծառուկյանի օգտին»:
Լրագրողի դիտարկմանը, թե մանդատի վաճա՞ռք է կատարվում, Գալուստ Սահակյանը չհամաձայնեց. «Ես ընդամենն ասում եմ՝ նրա բացակայությունը իմ կողմից հարգելի համարվեց: Իսկ վաճառվում են նրանք, ովքեր վաճառվում են»:
