Ազգային ժողովի Հանրապետական խմբակցության անդամ Մանվել Բադեյանը վերջին օրերին սահմանային լարվածության ժամանակ այնտեղ չի եղել, հետևաբար չի կարող ասել, թե ինչ աստիճանի լարված է եղել իրավիճակը: Բայց մի բան նրա համար հստակ է` Հայաստանը պետք է մշտապես հակաահաբեկչական գործողություններ իրականացնի Ադրբեջանի դեմ:
«Մենք պետք է մշտապես հակաահաբեկչական գործողություններ իրականացնենք, քանի որ Ադրբեջանն իրոք, տեռորիստական երկիր է», -այսօր լրագրողների հետ հանդիպմանը հայտարարեց Բադեյանը:
Ինչ վերաբերում է այն հայտարարություններին, թե ստեղծված իրավիճակներում Հայաստանի դիվանագիտությունը կաղում է, ապա Բադեյանի պնդմամբ, Հայաստանի դիվանագիտությունը «կուզեկուզ ման չի գալիս»:
«Հայկական կողմի պասիվ լինելու արդյունքում ժողովուրդների ինքնորոշման սկզբունքի հարցը չէր դրվի ոչ մի փաստաթղթում: Դիվանագիտական անհաջողությունների մասին խոսք լինել չի կարող: Եթե մենք անընդհատ դիվանագիտական անհաջողությունների մեջ ենք, ինչո՞ւ ժողովուրդների ինքնորոշման սկզբունքը մինչև հիմա հերքված չէ», -հայտարարեց Բադեյանը:
