Ռուսաստանի շահերը թույլ չեն տալիս, որպեսզի այդ երկրի նախագահ Վլադիմիր Պուտինը արձագանքեր ՀՀ սահմանային լարվածության մասին Նախագահ Սերժ Սարգսյանի մտահոգությանը, որի մասին ՀՀ Նախագահը բարձրաձայնեց Պուտինի հետ սեպտեմբերի 7-ին ունեցած հանդիպմանը, այս մասին այսօր հրավիրված մամուլի ասուլիսին հայտարարեց «Ընդդեմ իրավական կամայականության» ՀԿ-ի նախագահ Լարիսա Ալավերդյանը։
«Չի գտնում, որովհետև հարմար պահ է, երբ պետք է առևտուր անի Ադրբեջանի հետ զենքի վաճառքի հարցով: Իսկ սա կոչվում է քաղաքականություն, որտեղ Պուտինը պահպանում է Ռուսաստանի շահը և նաև դրանով մարտահրավեր է ՀՀ իշխանություններին, որ իրենք էլ պետք է պահեն իրենց ազգային շահը»,- ասաց նա:
Լարիսա Ալավերդյանի պնդմամբ՝ Հայաստանն իրեն պետք է հավասար զգա իր ռազմավարական գործընկերոջ հետ և այստեղ պետք չէ գտնել մեղավորներ: «Մենք պետք է նայենք մեզ և ինքներս մեզ ուժեղացնենք»,- ասաց նա:
Ալավերդյանի խոսքով՝ այն փոքր պետությունները, որոնք չեն կարողանում հասնել խաղաղության՝ պետք է հույսը դնեն իրենց ժողովրդի կարողությունների վրա, այդ թվում նաև դիվանագիտական կարողությունների վրա:
«Այս մասշտաբների պատերազմների մեջ, որը թույլ է տրվում եռապետությունների կողմից, այո՛, Հայաստանն այդ ուժն ունի, որ դիմակայի: Դա գիտի Ադրբեջանը, գիտի իր հետ համագործակցող պետությունները և գերկորպորացիները, ինչպես օրինակ՝ «Բրիթիշ պետրոլյումը»»,-ասաց նա և հավելեց, թե այնտեղ, որտեղ խոսքը ռեալ ժողովրդի ուժի և ոգու մասին է, մենք դա ունեք, և իշխանությունը հենց դրա վրա էլ հիմնվում է:
Լարիսա Ալավերդյանի համոզմամբ՝ երկարատև ստրատեգիական հարաբերությունների մեջ Հայաստանը պետք է մնա և կարողանա որևէ մեկի հետ չխզել հարաբերությունները՝ զուգահեռ՝ պահպանելով ազգային շահը:
Նա նաև նշեց, թե հստակ պետք է իմանալ, որ Ռուսաստանը պայքարել և պայքարելու է՝ թույլ չտալով ԱՄՆ-ին սուպերպետություն զգալ այս տարածաշրջանում: Ալավերդյանը նկատեց, թե ինքը դեմ է, որ աշխարհում մեկը լինի ամենաուժեղը: «Կողմ եմ կոնկուրենցիային, քան որևէ մեկը գերակա դիրք ունենա և պահանջներ ներկայացնի: Եթե ՌԴ-ն իրեն դնի սուպերպետության դիրքում և չկարողանա հաստատել խաղաղություն աշխարհում, ես նաև նրան դեմ կլինեմ»,-ասաց նա:
