Բրիտանացի երգիչ Էլթոն Ջոնի հետ Ռուսաստանի նախագահ Վլադիմիր Պուտինի և նրա մամլո քարտուղար Դմիտրի Պեսկովի անունից հեռախոսով զրուցել են հեռախոսային խուլիգանները:
Երգիչը վստահ է եղել, որ շփվել է Վլադիմիր Պուտինի հետ և նույնիսկ շնորհակալություն հայտնել, գրում է Vesti.ru-ն:
Պատասխանատվությունն իրենց վրա են վերցրել հայտնի հեռախոսային խուլիգաններ Վլադիմիր Կրասնովը (Վովան) և Ալեքսեյ Ստոլյարովը (Lexus):
«Ալեքսեյը շատ լավ անգլերեն է խոսում, դրա համար էլ նաև Դմիտրի Պեսկով է ներկայացել և թարգմանել մեր զրույցը: Իսկ Վլադիմիր Պուտինը ես էի: Էլթոն Ջոնին զանգահարել եմ Մոսկվայի ժամանակով` 17:30-ին: Այդ պահին նա Լոնդոնում էր` իր ձայնագրման ստուդիայում»,- ասել է Կրասնովը:
Նա խոստովանել է, որ այս գաղափարն իր մոտ ծագել է այն բանից հետո, երբ Էլթոն Ջոնը հայտարարել է Պուտինի հետ հանդիպելու ցանկության մասին:
Կրասնովի խոսքերով` զրույցի վերջում Էլթոն Ջոնն ասել է, որ դա իր կյանքում ամենալավ հեռախոսազրույցն էր:
