ՄԱԿ-ի փախստականների հարցերով գրասենյակը Հունգարիային մեղադրել է Հյուսիսային Եվրոպա մտնել փորձող միգրանտների ՝ այդ թվում կանանց ու երեխաների դեմ բռնություն կիրառելու համար:
Գործակալության ներկայացուցիչը հայտարարել է, որ Հունգարիան միանգամայն իրավասու էր պաշտպանել իր սահմանները, սակայն պետք է միաժամանակ պահպաներ մարդասիրության նորմերը:
Դրա փոխարեն, նրա խոսքով, չորեքշաբթի օրը կարելի էր տեսնել մարմնական վնասվածքներ ստացած երեխաների, որոնցից մի քանիսին բաժանել էին ընտանիքներից, հայտնում է BBC-ի Ռուսական ծառայությունը
Հունգարիայի վարչապետ Վիկտոր Օրբանն էլ իր հերթին հայտնել է, որ պատրաստ է պատնեշ կառուցել Խորվաթիայի ու Ռումինիայի հետ սահմաններին ՝ միգրանտներից պաշտպանվելու նպատակով:
Սերբիայի ու Հունգարիայի սահմանին հարյուրավոր մարդիկ էին խմբվել, որից հետո Հունգարիայի իշխանությունները սահմանի երկայնքով փշալարեր են տեղադրել, որպեսզի թույլ չտան փախստականներին իրենց երկիր մտնել:
Չորեքշաբթի օրը Հունգարիան արցունքաբեր գազ ու ջրանետ սարքեր է կիրառել միգրանտների դեմ ՝ հայտարարելով, որ փախստականների սահմանն անցնելու փորձերի հետեւանքով վիրավորում է ստացել ավելի քան 20 ոստիկան:
