Արարատի մարզի խաղողագործներն արդեն մեկուկես ժամ է փակ են պահում Երեւան-Արարատ մայրուղին: Նրանք պահանջում են մթերել իրենց խաղողի բերքը, Մի քանի հարյուր խաղողագործներ մոտ 20՝ խաղողի չմթերված բերքով բեռնված մեքենաներով փակել են մայրուղին եւ հրաժարվում են բացել այն:
Արարատի մարզպետ Ռուբիկ Աբրահամյանը եւ գյուղատնտեսության նախարարի տեղակալներ Սամվել Գալստյանը, Ռոբերտ Մակարյանը փորձել են համոզել գյուղացիներին, որ բացեն ճանապարհը, բայց ապարդյուն:
Գյուղացիները պնդում են, որ մինչեւ նախագահ Սերժ Սարգսյանը կամ վարչապետ Հովիկ Աբրահամյանը չգան, իրենք չեն հեռանալու: Մարզպետի պնդմամբ, Հովիկ Աբրահամյանը ճանապարհին է, և շուտով կհասնի:
Նշենք, որ գյուղացիներն ասում են, որ տարբեր պատճառաբանություններով Մասիսի «Նոյ» գործարանը չի ընդունում իրենց խաղողի բերքը:
