Այսօր ԱԺ տնտեսական հարցերի մշտական հանձնաժողովի նիստում քննարկվում էր ազգային վիճակագրական ծառայության եռամյա ծրագիրը քառօրյա նիստում ընդգրկելու մասին հարցը:
ԲՀԿ-ական Միքայել Մելքումյանը ԱՎԾ ներկայացուցչին՝ Ստեփան Մնացականյանին, հարցրեց, թե որքան է կազմում աղքատության ցուցանիշը Հայաստանում: Վերջինս պատասխանեց, որ տվյալ պահին չի հիշում ցուցանիշը 2013թ. ցուցանիշը, իսկ 2014-ի ցուցանիշները դեռ չեն ամփոփվել:
ԱԺ պատգամավոր Խաչատուր Քոքոբելյանը ասաց ԱՎԾ ներկայացուցչին, որ դասախոսություն չկարդա, այլ ասի հայաստանցիների գլխին գալիքը,
«Ասա տեսնենք թե ի՞նչ է սպասվում, որքա՞ն է լինելու ազգաբնակչության թիվը, որովհետև դա է ամենագլխավոր հարցը երկրում և ամենագլխավոր ազգային անվտանգության հարցը: դասախոսություն մի կարդա»,- ասաց Խաչատուր Քոքոբելյանը:
Երբ կրքերը թեժանում էին՝ Հանձնաժողովի նախագահ Վարդան Այվազյանը միջամտեց` ասելով, թե քանի որ կրքերը թեժանում են, ճիշտ կլինի պատգամավորները հարցեր տան օրենքի վերաբերյալ:
Հրանտ Բագրատյանն էլ արձագանքեց, թե Վարդան Այվազյանը չի թողնում, որ պատգամավորներն իրենց հարցերը ուղղեն:
«Եկած-չեկած` սկսեցիք գոռգոռալը»,- Հրանտ Բագրատյանին ասաց Վարդան Այվազյանը:
«Որ դու չգոռայիր, մենք չէինք գոռա: Այ ցավդ տանեմ, թող էս նիստերը կայանան: Նենց հարցեր կտամ ԱՎԾ ներկայացուցչին, ինքը բավարարված կմնա, ինչի՞ ես պաշտպանում նրան»,- հարցրեց Հրանտ Բագրատյանը:
Խաչատուր Քոքոբելյանն առաջարկեց Վարդան Այվազյանին, որ փակ նիստ հրավիրեն, որովհետև իրենք բազմաթիվ հարցեր ունեն ԱՎԾ-ին:
