Չինաստանն Անտարկտիդայում չորրորդ գիտահետազոտական կայանն է բացել:
ՉԺՀ-ի բեւեռային բրիգադը նոր գիտահետազոտական «Տայշան» կայանի շինարարությունն ավարտել է: Աշխատանքները շարունակվել են 45 օր:
Հաղորդվում է, որ կայանը գտնվում է Եղիսաբեթ արքայադստեր երկրում` Անտարկտիդայի արեւելքում, ծովի մակարդակից երկուսուկես հազար մետր բարձրությունում: Կայանը կարող է տեղավորել 28 մարդու եւ հիշեցնում է չինական լապտեր:
ՉԺՀ-ի գիտնականների անտարկտիդյան ուսումնասիրությունները կապված են կլիմայի գլոբալ փոփոխության խնդրի հետ: Կայանի աշխատակիցները կզբաղվեն երկրաբանական եւ մթնոլորտային հետազոտություններով:
Նոր կայանը գործելու է դեկտեմբերից մարտ ժամանակահատվածում:
Նշվում է, որ «Տայշանը» Անտարկտիդայում չինական չորրորդ կայանն է, հայտնում է Չինաստանի կենտրոնական հեռուստատեսությունը:
Պեկինը հետագայում ծրագրեր ունի հիմնել հինգերորդ՝ կլոր տարին գործող բեւեռային կայանը, այն պետք է բացվի 2015թ. վերջին` Վիկտորյայի երկրում:
