Վարչապետ Հովիկ Աբրահամյանը ներկա է գտնվել Գերմանիայի Դաշնային Հանրապետության Միասնության օրվա առթիվ կազմակերպված պաշտոնական ընդունելությանը: Կառավարության ղեկավարը հանդես է եկել շնորհավորանքի խոսքով, որում, մասնավորապես, նշել է.
«Հայաստանի Հանրապետության կառավարության եւ անձամբ իմ անունից ի սրտե շնորհավորում եմ Ձեզ, պարո՛ն դեսպան, Գերմանիայի դեսպանության անձնակազմին եւ Ձեր միջոցով Գերմանիայի բարեկամ ժողովրդին եւ իշխանություններին՝ Գերմանիայի Միասնության օրվա առթիվ: Գերմանիայի Դաշնային Հանրապետության համար հոկտեմբերի 3-ը, իրավամբ, նշանակալի օր է: 25 տարի առաջ` 1990 թվականին այդ օրը, իրականություն դարձավ միլիոնավոր գերմանացիների վաղեմի երազանքը` Գերմանիայի երկու հատվածների վերամիավորումը: Այն նաեւ եվրոպական եւ համաշխարհային նշանակության իրադարձություն էր, քանզի բեռլինյան պատի փլուզումը ազդարարեց տոտալիտար վարչակարգերի մի ամբողջ դարաշրջանի ավարտը` սկիզբ դնելով Արեւելյան Եվրոպայի պետությունների ազատ ու ժողովրդավարական զարգացմանը եւ իր ազդեցությունը թողեց համաշխարհային հետագա գործընթացների վրա: Այսօր միացյալ Գերմանիան միջազգային բեմահարթակում կարեւոր դերակատար է, ակտիվ մասնակցություն ունի գլոբալ մարտահրավերների հաղթահարման գործում, ինչպես նաեւ իր ծանրակշիռ ներդրումն է բերում տարածաշրջանային անվտանգության եւ կայունության պահպանմանը:
Գերմանիայի հետ հարաբերությունների հետեւողական զարգացումը եղել եւ մնում է Հայաստանի արտաքին քաղաքականության գերակայություններից: Մենք մեծապես կարեւորում ենք Գերմանիայի հետ համագործակցության խորացումը եւ ընդլայնումը թե՛ երկկողմ եւ թե՛ բազմակողմ ձեւաչափերով, այդ թվում` Արեւելյան գործընկերության շրջանակներում: Հայ-գերմանական երկկողմ հարաբերությունների զարգացման համար բարենպաստ հիմք են հանդիսանում մեր երկու ժողովուրդների միջեւ դարավոր պատմամշակութային կապերը, ինչպես նաեւ Գերմանիայի բազմահազարանոց հայկական համայնքի գործոնը:
Ավելի քան երկու տասնամյակների միջպետական համագործակցության ընթացքում մեր երկու երկրների միջեւ ձեւավորվել եւ հաջողությամբ է ընթանում բարձր մակարդակի քաղաքական երկխոսությունը: Սերտ կապեր են հաստատվել Հայաստանի Ազգային ժողովի եւ Գերմանիայի Բունդեսթագի միջեւ: Ակտիվ փոխգործակցություն է ծավալվել մշակութային, գիտակրթական, առեւտրատնտեսական եւ այլ ոլորտներում: Գերմանիան Հայաստանի կարեւոր առեւտրային գործընկերներից է, իսկ Եվրամիության երկրների մեջ` առաջինը: Հայաստանում ներկայում գործում են գերմանական կապիտալի մասնակցությամբ ավելի քան ութ տասնյակ ձեռնարկություններ: Գործում է ֆինանսատեխնիկական հարցերով հայ-գերմանական միջկառավարական հանձնաժողովը, որը առանցքային դերակատարում ունի համագործակցության ծրագրերի ընտրության հարցում: Հատուկ ուզում եմ շեշտել նաեւ մեր երկու երկրների զինված ուժերի միջեւ սերտ համագործակցությունը միջազգային խաղաղապահ առաքելությունների իրականացման շրջանակներում Աֆղանստանում:
Հայ-գերմանական փոխշահավետ համագործակցության ցանկը կարելի է երկար շարունակել: Միեւնույն ժամանակ, համոզված եմ, որ մեր երկկողմ կապերը զարգացման մեծ ներուժ ունեն: Լիահույս եմ, որ փոխադարձ ջանքերի ներդրմամբ մեզ ոչ միայն կհաջողվի պահպանել, այլ է'լ ավելի խթանել հայ-գերմանական հարաբերությունների զարգացման դրական դինամիկան` այդ հարաբերությունները բարձրացնելով որակական նոր մակարդակի` ի շահ մեր երկու երկրների բարեկամության ամրապնդման:
Ավարտելով խոսքս` ցանկանում եմ մեկ անգամ եւս շնորհավորել բոլորիդ այս հիշարժան տոնի առթիվ՝ Գերմանիային մաղթելով հետագա առաջընթաց, իսկ բարեկամ գերմանացի ժողովրդին` խաղաղություն եւ բարեկեցություն»:
