Համարվում էր, որ գոյություն ունի փողկապ կապելու մոտ 200 միջոց։ Ստոկհոլմի Տեխնոլոգիաների թագավորական ինստիտուտից մաթեմատիկոս Միկաել Վեյդեմո Յոհանսոնն ապացուցել է, որ այդ ձևերը գրեթե 1000 անգամ շատ են։ Նա հաշվարկել է 177.147 միջոց, գրում է «Комсомольская правда»-ն։
Հետաքրքիր է, որ այդ բացահայտմանը Միկաելին դրդել են ոչ թե բարձրագույն մաթեմատիկայի տեսությունները, այլ հոլիվուդյան «Մատրիցա» ֆիլմից չարագործ Մերովինգենի փողկապի բարդ հանգույցը։ Ֆիլմում այդ կերպարի փողկապն ունի բարդ և քիչ հայտնի Ediety հանգույց, որը ֆիլմի թողարկումից հետո ստանում է նոր անվանում՝ Մերովինգենի հանգույց։
«Մատրիցա» ֆիլմի երկրպագուները փորձել են կրկնել բարդ հանգույցը և դրա վերաբերյալ հոլովակներ տեղադրել YouTube-ում։ Ստոկհոլմցի մաթեմատիկոսը տեսել է այդ հոլովակներից մեկը և սկսել հետաքրքրվել այդ խնդրով։ Երեք այլ մաթեմատիկոսների հետ նա ընդամենը 3 բաղադրիչների օգնությամբ՝ W, T, U, կարողացել է ստեղծել հանգույցների գեներատոր, որի շնորհիվ կարելի է այժմ սովորել կապել ամենայուրահատուկ հանգույցները։
Սակայն այդ բոլորը փորձելու և լավագույնն ընտրելու համար կպահանջվի առնվազն 4 ամիս։ Եվ մի պայմանով՝ չուտել, չքնել և յուրաքանչյուր հանգույցի վրա ծախսել միայն մեկ րոպե։
