Աշխարհի, Եվրոպայի առաջնությունների, Օլիմպիական խաղերի բազմակի չեմպիոն, ԽՍՀՄ սպորտի վաստակավոր վարպետ, միջազգային կարգի մրցավար, ՀՀ ֆիզիկական կուլտուրայի և սպորտի վաստակավոր գործիչ, ՀՀ վաստակավոր մարզիչ, ՀՀ ֆիզիկական կուլտուրայի պատվավոր պրոֆեսոր Ալբերտ Ազարյանը ծնվել է 1929թ. Գանձակում, արհեստավորի ընտանիքում:
1939թ. տեղափոխվել են Վանաձոր (նախկինում` Կիրովական), իսկ 1947թ.` Երևան։
1944թ. հոր մահից հետո աշխատել է դարբնի աշակերտ` զուգահեռ հաճախելով երեկոյան դպրոց:
1946 թվականից զբաղվել է սպորտով՝ ըմբշամարտով և ծանրամարտով։
1947թ. Մոսկվայում մասնակցել է ֆիզկուլտուրնիկների համամիութենական շքերթին:
1948-52թթ. սովորել և ավարտել է Հայկական ֆիզկուլտուրայի տեխնիկումը: Ուսմանը զուգահեռ, Սեմյոն Կարագյոզյանի ղեկավարությամբ զբաղվել է սպորտային մարմնամարզությամբ։
1952թ. առաջին անգամ դարձել է ԽՍՀՄ չեմպիոն օղակներից։
1953թ. ԽՍՀՄ հավաքականի կազմում մեկնել է միջազգային մրցումների Չինաստան, այնուհետև` Ֆրանսիա:
1954թ. ԽԱՀՄ հավաքականի կազմում մասնակցել է Իտալիայում աշխարհի առաջնության մրցումներին և դարձել աշխարհի չեմպիոն օղակներից։
1955թ. Արլ. Գերմանիայում մասնակցել է Եվրոպայի առաջնության մրցումներին և նվաճել երկու մեդալ` օղակներից և զուգափայտից։
1956թ. Ավստրալիայում դարձել է Օլիմպիական խաղերի չեմպիոն օղակներից։
Պարգևատրվել է «Աշխատանքային կարմիր դրոշ», «Փառքի նշան», ՀՀ «Մովսես Խորենացի» շքանշաններով:
