Մենք մտահոգված ենք Թուրքիայում բոլոր այն լրատվամիջոցների համար, որոնք այս օրերին թուրքական կառավարությանը իրենց քննադատական մոտեցումների պատճառով հայտնվում են արհեստածին մեղադրանքների մեջ, որոնցից առավել վտանգավորը իբր ահաբեկչական քարոզչություն կատարելն է: Այս մասին գրված է ԱՄՆ պետդեպարտամենտի տարածած հաղորդագրության մեջ։
Այստեղ մասնավորապես նշվում է․ «Մենք կոչ ենք անում Թուրքիային հարգել լրատվամիջոցների ազատ խոսքի իրավունքը, պաշտպանել անվտանգ գործունեությունը, որն էլ հենց ամրագրված է Թուրքիայի սահմանադրության մեջ: Մենք նոյեմբերի մեկին ուզում ենք տեսնել ազատ, արդար, վստահելի ընտրություններ այնտեղ:
Հարձակումները ազատ լրատվամիջոցների և լրագրողների վրա վրա արդեն ավելի ու ավելի է տարածվում Թուրքիայում: Վերջին օրինակներից են Ահմեդ Հաքանի վրա հարձակում»:
Նշենք, որ սեպտեմբերի 6-ին , իշխանամետ 150 հոգանոց մի խումբ,որը գլխավորում էր Արդարություն և զարգացում կուսակցության (AKP) անդամ, պատգամավոր Աբդուրրահիմ Բոյնուքալին, հարձակվել են ոչ իշխանական թերթերի խմբագրությունների գրասենյակների վրա:
Մոտավորապես մեկ շաբաթ անց, սեպտեմբերի 15 -ին, թուրք դատախազները սկսել են հետաքննություն իրականացնել ընդդիմադիր թերթերի խմբագիրների նկատմամբ՝ հիմք ընդունելով «ահաբեկչական քարոզչություն» արհեստածին մեղադրանքը:
