ԱԺ-ում Մարդու իրավունքների պաշտպանի տարեկան հաշվետվության ժամանակ «Հայ ազգային կոնգրես» խմբակցության քարտուղար Արամ Մանուկյանը անդրադառնալով մարդու իրավունքների պաշտպանի զեկույցին, հայտարարեց, թե օմբուդսմենը պետք է թիվ մեկ ընդդիմադիրը լինի երկրում։
Նրա խոսքով, Հայաստանում մարդու իրավունքների պաշտպանությունն այնպիսի անմխիթար վիճակում է, որ օմբուդսմենը պետք է լինի ոչ թե պաշտպանվող, այլ՝ հարձակվող: Ըստ պատգամավորի՝ ՄԻՊ զեկույցն ադեկվատ չէ մեր իրականությանը: Մանուկյանը քննադատեց օմբուդսմենին անուններ չհնչեցնելու համար:
«Սուրիկ Խաչատրյանի մասին կարելի է ֆիլմեր նկարել, կրիմինալիստիկայի մեջ էդ ընտանիքը կարելի է մտցնել, Ռուբեն Հայրապետյանի համար կարելի է տրեյլեր նկարել: Ձեր պաշտպանվածությունը կոնվենցիաներն են, մի քիչ վստահ պաշտպանեք մարդու իրավունքները, թող քննադատեն ձեզ դրա համար: Ձեր ֆունկցիան իշխանությունների կողմից քարկոծվելն է, կհանեն, ոչինչ, կգնաք որպես իսկական պաշտպան: ԹԵ չէ Էդպես քաղաքավարի, հուշիկ-մուշիկ չի լինի»,-նշեց Արամ Մանուկյանը:
