Այսօր ԱԺ արտահերթ նիստում նույնականացման քարտերի մասին նախագծի քննարկման ժամանակ ՀՀԿ խմբակցության ղեկավար Վահրամ Բաղդասարյանը նշեց, որ ամեն ինչ արվում է, որպեսզի հանրության ուշադրությունը շեղեն սահմանադրական բարեփոխումներից:
Դիմելով ընդդիմությանը, մասնավորապես, ՀԱԿ խմբակցության ղեկավար Լևոն Զուրաբյանին, ՀՀԿ խմբակցության ղեկավարն ասաց. «Գիտեք` ինչո՞ւ ՀԱԿ-ը չի վստահում ժողովրդին, որովհետև ժողովուրդն էլ իրենց չի վստահում: Դրա համար նրանք վրեժ են լուծում ժողովրդից: Գիտեք` ինչո՞ւ նրանք չեն վստահում հանձնաժողովի իրենց անդամներին, որովհետև իրենց իսկ վստահված անձինք չեն վստահում իրենց, քանի որ ժամանակին տեսել են, թե իրենք ինչեր են արել, ինչ մեխանիզմներ են կիրառել: Եվ կեղծարարների այն պոտենցիալը, որ նրանք ունեին, նրանց դեմն ո՞վ կարող էր առնել»,- ասաց Վահրամ Բաղդասարյանը:
Նա անդրադարձավ նաև ՕԵԿ խմբակցության պատգամավորներին և և նրանց հորդորեց ամպագոռգոռ հայտարարություններով հանդես չգալ:
«Դուք իշխող կոալիցիայում մեր գործընկերներն էիք, իսկ այժմ նման կտրուկ գնահատականներ եք տալիս՝ «Ամեն ինչ արդեն կեղծված է» եւ այլն։ Բայց չէ՞ որ ինչ ասես, կարող է պատահել։ Քաղաքական իրավիճակը կփոխվի եւ գուցե նորից համագործակցելու անհրաժեշտություն առաջանա։ Ինչպե՞ս եք վերհիշելու այն, ինչ հենց վերջերս էիք ասում»,- ասաց Վ.Բաղդասարյանը:
Վ.Բաղդասարյանի քննադատությունից անմասն չմնաց «Ժառանագություն» կուսակցությունը: Նրա խոսքերով՝ ընդդիմությունն իրեն չի կարողանում մոբիլիզացնել, բայց խոսում է ժողովրդին մոբիլիզացնելուց:
««Ժառանգությունը», բոլորին գցեցիք դռնեդուռ, Րաֆֆին չգիտի՝ ինչ է անում, առաջարկում ենք՝ արի, սահմանադրական բարեփոխումների հանձնաժողովը ղեկավարի, հրաժարվում է, ընտրում ենք դեպուտատ, գալիս, հրաժարվում է»,- նշեց նա։
Վ.Բաղդասարյանի խոսքերով՝ հիմա ընդդիմությունն այդ ձևով ուզում է ժողովրդի պատասխանատվությունը վերցնել:
